Angutit marluk toqupput - marluk tigusaapput
Aasianni politiit arfininngornermi ullaakkut ulappupput. Angutit marluk toqusimapput, marlullu tigusarineqarlutik. Angutit marluk toqunerat suliatut ataatsitut politiinit suliarineqarpoq - matoqqasumik
Arfininngornermi ullaakkut arfineq-marluk qaangilaaraa illoqarfimmi najukkat ilaanni angutip inuusuttup imminut toqussimaneranik Aasianni politiit nalunaarfigineqarput.
Taama vicepolitikommisær Pavia Kleist Sermitsiaq.AG-mut ilisimatitsivoq.
- Najugaqarfik orninneqarpoq nalunaaquttallu akunnerata ataatsip ingerlanerani Aasianni politeeqarfik pisumik allamik nalunaarfigineqaqqippoq. Tamatumuuna illoqarfimmi najukkami allami paggittoqarneranik. Politiit najukkamut apuukkamik angut ilisimajunnaaqqasoq siumorpaat, taannalu nakorsamit aggersarneqarsimasumit sivitsunngitsoq toqusimasutut nalunaarutigineqarpoq, Pavia Kleist oqaluttuarpoq.
Taanna ilisimatitsilluni oqarpoq, inuit marluk politiinit tigusarineqartut, taakkualu kingusinnerusukkut inatsisit tunngaviusut naapertorlugit sassartinneqassasut, tamannalu matoqqasumik pissagunartoq.
- Suliamut atatillugu annertunerusumik ilisimatitsisinnaanngilanga. Kisianni inuit marluk toqunerat suliatut ataatsitut ingerlapparput.
- Imaappa, imminut toquttoqarsimaneranik nalunaarutisiarsi siulleq toqutsinerusinnaasoq? Tigusarineqartullu taakkua marluk inuit marluk toqunerannut attuumassuteqartinneqartut?
- Tamanna pillugu oqaaseqarsinnaanngilanga. Inuit marluk tigusaraavut, Pavia Kleist oqarpoq.