Timmisartumik Danmarkiliaanneqalerpoq

Nuummi Blok P-mi tallimanngornermi ullaakkut ajutoortoqarneranit tupinnartumik aniguisoq tassaavoq angut 57-inik ukiulik Danmarkimi isaterinermik suliffeqarfimmit SIlkeborgimi qullersaqarfeqartumit Kingo Karlsen A/S-imeersoq.

Angutip ajoquserneri Dronning Ingridip Napparsimmavissuani nakorsanit misissorneqarsimalerput.

Kingo Karlsen A/S-imi tuniniaanermut pisortaq Jørn Bak napparsimmavissuarmut oqarasuaatikkut attaveqarsimavoq:

- Suleqateqarput misissorneqarsimavoq nakorsallu paasisimavaat pukutsimini qiteralimminik marlussunnik napisoqarsimasoq. Pukusuani qiteraliit sisamaat tallimaallu pineqarput, Jørn Bak ilisimatitsivow.

- Nukillaaratarsinnaavami?

- Qujanartumik nukillaarsimagunanngilaq. Pukusummi qiterallit pineqartillugit soorunami aarlerinartoqartuartarpoq. Kisianni tallini nissunilu aalatissinnaavai, Jørn Bak akivoq.

Ilaqutai ilisimatinneqarput
Kingo Karlsen A/S angutip ilaqutaanut Danmarkimiittunut attaveqarsimavoq.

- Nuummut ornissinnaaniassammassuk timmisartumut bilitsinik ingerlatiinnaq inniminniivugut. Maannali napparsimmavissualiaanneqartussanngormat bilitsit taamaatiinnarpugut. Taarsiullugu Københavniliassapput, Jørn Bak ilisimatitsivoq.

- Isaterisoqarnerani ikiorti imermik serpartaasoq qanoq piva?

- Soorunami tuparujussuarsimavoq. Suleqatip taama nalaataqarnera takullugu sakkortuvoq. Eqqarsartaatsimgut isumagineqarnissaa aaqqissuunneqarpoq. Qujanartumik timikkut ajoqusersimanngilaq, Jørn Bak ilisimatitsivoq.

Ajutoornermut pissutaasoq oqaatigissallugu siusippallaartoq
Tuniniaanermut pisortaq naapertorlugu ajutoornermut, kranimit betonngit kingulliit uppisinneqartussanngormata pisumut, pissutaasoq oqaatigissallugu suli siusippallaarpoq.

- Susoqarsimanersoq paasiuminaatsilluinnarparput. Isaterineq maannamut ajornartorsiutitaqanngitsumik ingerlasimavoq. Sulisorpullu misilittagartoorujussuuvoq, Jørn Bak oqarpoq, suliffeqarfiullu pisortaa Thomas Kingo Karlsen aqagu arfininngornermi timmisartumik Nuuliassanerarlugu suleqatini peqatigalugu ajutoornermut pissutaasoq paasiniarsinnaajumallugu.

Læs "Læger er i fuld gang"

Se "Galleri: Her bliver manden reddet"

Læs "Manden er fri - brandmænd er dagens helte"

Læs "Direktør: Jeg er rystet"

Læs "Blok P kollapset – mand i gravko ved bevidsthed"

Læs "Blok P er faldet"