Angut annaanneqarpoq - qatserisartut sapiitsuliorput

Tallimanngorneq ullaaq ilungersunartumik aallartippoq Nuummi Blok P-mi majuartarfeqarfik kingulleq uppimmat assaassuarlu aquttarfimmi inuttaqartoq uppiffigalugu. Taamaalinerani nalunaaquttap arfineq-pingasut qaangilaarpaa.

Iikkap kingulliup nal. 09.30 uppisinneqarnissaa inissiaatileqatigiifimmit INI-mit tusagasiuutitigut nalunaarut aqqutigalugu ilisimatitsissutigineqarsimagaluarpoq, inissiatoqarsuarli tusaamanerlugaasoq tamatumunnga peqataajumanngilaq.

Qatserisartut biilii, ambulancit politillu biilii ikittaartuinnaallutik takkussuupput. Inuit untritillit arlallit katersuussimapput ajutoornerullu annertussusaa isiginnaarlugu, taamaalineranilu angutip kiggigussaaqqasup anniarluni nillerpallattarnera inuppassuarnit tusaaneqarsinnaasarpoq. Ukaliusami aamma Atuarfik Samuel Kleinschmidtimi atuartut ilinniartitsisunit peersinneqannginnerminni ajutoornerup piliaanik tupassimaqalutik aallaamapput.

Læs "Direktør: Jeg er rystet"

Læs "Blok P kollapset – mand i gravko ved bevidsthed"

Læs "Blok P er faldet"

Akunnermi ataatsimi kiggigussaaqqasoq
Angut assaassuarmi uppiffigineqartumi akunneq ataaseq sinnilaarlugu mattussaaqqareerluni kiisami qatserisartunit aniguisinneqarpoq. Taamaalinerani nalunaaqutaq 9.20-nngorpoq. Akiummut aalajangerneqarsimavoq annoraaminermillu qaqortumik ulinneqarsimalluni.

- Silaannalersuut, silaannalersorneqartariaqarpoq, qatserisartoq suleqatiminut oqarpoq.

Angut ajoqusertoq aqqartinneqannginnermini anersaartuummik kiinarpalerneqarpoq.

Akiut Kongevejiliaanneqarpoq. Angut nakorsamit misissorneqarpoq, taamaalineranilu qatserisartunit tippimik asserneqarluni aqquserngup akianiittuni takuneqarsinnaajunnaarlugu. Kiisami akiut portørinit ambulancit tungaannut kaammisarneqalerpoq. Inuppassuit annilaarsimarpaseqalutik nakkussipput, arnarlu ima oqarpallammat malunnartumik oqiliallanneqarluni:

- Isikkani aalatippaa. Takuiuk? Isikkani aalatippaa.

Ajutoornerup pineraniit nalunaaquttap-akunnerata aappaa affaq qaangiuttorlu angut ajoqusersimasoq ambulancinik Dronning Ingridip Napparsimmavissualiaanneqarpoq, inuillu qimagussorusaalerlutik, qularnanngitsumik suliartorlutik allanillu suliassaqarlutik.

Qatserisartut ulloq manna sapiitsuliortuupput.