- Ove Karl, inersimarpalaarnerunngilaq
Ove Karl Berthelsen ICC-mut Avatamullu isornartorsiuinermini tamat oqartussaaqataanneranni inersimarpalaanngissusermik takutitsivoq. Suliniaqatigiiffiit aatsitassanut uuliamullu atatillugu oqallinnermut peqataanerat taarsiullugu nuannaarutigisariaqaraluarpaa, oqaatigineqarpoq
Nunatsinni suliniutinut angisuunut isornartorsiuinermik isumaginninnermini naalakkersuisunut ilaasortaq Ove Karl Berthelsen, IA, tamat oqartussaaqataaneranni inersimarpalaannginnermik ersersitsivoq.
Ove Karl Berthelsen ICC-ip Avatallu sakkortuumik isornartorsiuinerannut akerlileereersorlu avatangiisinik illersuiniaqatigiiffik Avataq taama isumaqarpoq.
Læs "Ove Karl: Ret skytset mod mig"
Læs "Aqqaluk Lynge: En bombe under selvstyret"
Tassami tamat oqartussaaqataaneranni ingerlalluartumi suliniaqatigiiffiit ICC-tut Avatatullu ittut isummersortarnerat naammagalugu atorneqartariaqarpoq:
- Peqqissutsimut takussutissaq tamanna Ove Karl Berthelsenip nuannaarutigiinnartariaqaraluarpaa taamatullu tunniusimasoqarnissaa ilumoorluni kaammattuutigalugulu kajumissaarutigisariaqaraluarlugu 'ileqqupalaatut unitsinneqartariaqartutut' isiginagu. Tamat oqartussaaqataaneranni inerissimannginnermut ersiutaavoq, Avatap siulittaasua Mikkel Myrup isumaqarpoq, taannami isumaqarpoq Ove Karl Berthelsenip qisuariaataa 'eqqissiunnaarnartorujussuarnik ilaqartoq'.
Læs "Hård kritik af råstofdirektoratet"
Læs "Grønlands undergrund ikke kun for en lukket kreds"
ICC-mut Avatamullu akissuteqarnermini Ove Karl Berthelsen allappoq, suliniaqatigiiffiit isornartorsiuinerat taakkua aatsitassarsiornermi uuliasiornermilu suliniutinik nunatsinni kissaateqannginnerannut ersiutaasoq. Tamanna ICC-mit aalajangersimalluinnartumik akerlilerneqareerpoq - taamaapporlu aamma Avataq, Mikkel Myrup oqarpoq:
- Avataq suliniutinut angisuunut tapersersuisuunanilu akerlilersuisuunngilaq. Innuttaasut politikerillu sapinngisamik imartuumik ilisimatinneqarfiusimasumillu aalajangiinissamut tunngavissaqarnisaat innuttaasullu sapinngisamik isumaarnerpaamik akuutinneqarnissaat tapersersorparput. Aatsaat taama pisoqarpat suliniutini angisuuni pitsaaqutit ajoqutillu piviusumik oqallisigisinnaalissavavut - immaqa allaat tapersersuineq akerliunerlu ilanngullugit.
Læs "ICC skyder råstofkampagne i gang"
Ove Karl Berthelsenip ICC-ip Avatallu isornartorsiuinerannut akerliliinerminut atatillugu aatsitassat uulialu inuussutigineqassanngippata Kalaallit Nunaata sunik inuussuteqarnissaata suliniaqatigiiffinnit akineqarnissaa ujartorpaa. Kisianni tamanna tamat oqartussaaqataaneranni inersimarpalaannginnermut aamma takussutissaavoq, Mikkel Myrup isumaqarpoq:
- Suliniutit angisuut atuutilersinniarneqarneranni periuseq isornartorsioraanni suliniutinut angisuunut taartaasussanik saqqummiussaqarnissamik piumasaqarneq aamma tamat oqartussaaqataaneranni inerissimanngissutsimut takussutissaavoq. Inuiaqatigiinni nutaaliaasuni pisariusumillu ilusilersugaasuni tamallu oqartussaaqataanerat tunngavigalugu aqutseriaaseqartumi inuiaqatigiit qanoq aaqissuunneqarnissaannut aaqqiissutissamik tamakkiisumik inuk ataasiinnaq suliniaqatigiiffilluunniit (mikisoq) saqqummiussisinnaanngilaq tamatumalu peqatigisaanik ilumoorunneqarluni, Mikkel Myrup oqarpoq.
Ove Karl Berthelsenip isornartorsiuineranut Mikkel Myrup akissutaa tamaat matuma ataani atuaruk.