Ove Karl immikkut ilisimasallip assuarisai tunuartippai
Naalakkersuisunit tusaajumaneqanngilaq aatsitassanut inatsit avatangiisinik ulorianartitsisinnaasoq naak immikkut ilisimasallip taamannak nalileraluaraa
Allaaserisami tupaallannartumi 1. September 2012 Ingeniørimi saqqummersumi Aarhus Universitetimi avatangiisinut inatsisinik professorip Ellen Margrethe Basse, ilaatigut allappoq aatsitassanut inatsit nunatsinni avatangiisit ajornartorsiutaasa annersarigaat aamma VVM-imik nassuiaatit ingerlanneqareersut annerusumik imaqanngitsoq.
Kisianni tamanna aatsitassanut naalakkersuisumit Ove Karl Berthelsenimit tusaajumaneqanngilaq.
Taassuma professorip oqaaseqaatai kukkunerarpai ilumuunnginnerarlugillu.
- Erseqqinngilaq Ellen Margrethe Bassep qanoq isumaqarnersoq VVM-imik pisussaaffik annerusumik imaqannginnerarmagu. VVM-imi nalunaarusiaq peqqissaaqqissaarluni avatangiisinut sunniutaasinnaasunik aamma pinaveersaartitsilluni pakkersimaarutaasinnaasunik misissuinermit allaaserisaavoq. VVM-imik nalunaarusiaq suliarineqarpoq pitsaanerpaamik nunat tamalaat akornanni malittarineqartartut aallaavigalugit, DCEmit aamma Pinngortitaleriffimmit pisortatigoortumik nalilersorneqarluni oqaaseqarfigineqarlunilu Naalakkersuisunit aalajangiiffigineqannginnini sioqqullugu, Ove Berthelsen tusagassiivinnut allappoq Ellen Margrethe Bassep oqaaseqaatai aallaavigalugit.
Kikkut tamat periarfissaqarnerat nukittorsarneqarpoq
Atsitassanut inatsimmi Avatangiisit pillugit Nalilersuineq (VVM) pillugit malittarisassat aalajangersagaapput qulakkeerniarlugu, pisortat oqaasissaqarsinnaasut, suliniaqatigiiffiit kiisalu innuttaasut pitsaanerpaamik tunngavisseqqullugit aatsitassarsiornerup nassataanik avatangiisit qanoq sunnerneqarsinnaanerat pillugu. Avatangiisit annertuumik eqqorneqassappata, soorunami VVM-imik misissuineq ingerlanneqassaaq aamma misissueqqaarnernut tunngatillugu kiisalu misissuinernut aammalu minnerunngitsumik pisinnaatitsissutinik taamallu aatsitassarsiornerup kingorna matooraanernut atatillugu, VVM-imik misissuinerit sutigut tamatigut pinngitsooratik ingerlanneqartussaammata, Ove Karl Berthelsen oqarpoq inerniliilluni:
- Aatsitassanut inatsit innuttaasut periarfissaqartippai aatsitassarsiornernut atatillugu avatangiisinut apeqqutini tamaginni tusarneqarnissaannut.