Avatangiisit pillugit inatsit sanngiiffeqartoq
Kalaallit Nunaanni avatangiisit pillugit inatsit siorna atuutilersoq, putoqarpallaarpoq aamma innuttaasut naammagittaalliornissaannut periarfissaqanngilaq. – Aningaasat avatangiisinit siulliunneqarput, avatangiisit pillugit inatsisinik professori oqarpoq
- Kalaallit Nunaata nammineq avatangiisit salliutinniarsimanngilaa aningaasatigut kiffaanngissuseqannginneq siulliunniarlugu, avatangiisit pillugit inatsisinik Aarhus Universitetimi professori Ellen Margrethe Basse oqarpoq.
Ingeniørimut taamak oqarpoq, taamaaliornermigullu avatangiisinut naalakkersuisup Anthon Frederiksenip illersornissamik ministerimik Nick Hækkerup (S) ataatsimeeqqateqariartortumut naapertuuttumik oqarluni, Frederiksenip qinnutigiartormagu Kalaallit Nunaanni sakkutooqarfinni qimaannakkani Danmarkip saliinissaa.
Ellen Margrethe Basse isumaqarpoq avatangiisinut inatsit putoqarpallaartoq aamma apeqquserneqarujussuartariaqartoq innuttaasut naammagittaalliorsinnaanerat periarfissaat assersuutigalugu sumiiffiit ilaanni suliffissuaqarfinnik sanaartornissamut akuersisoqartillugu.
Ingeniørip inatsimmi putut makku assersuutitut saqqummiuppai:
* Kalaallit Nunaanni kommunip mikisup 5.000-nik innuttallip aamma killilimmik allaffissornermik ingerlatsisup ingerlatsivik piumasaqarfigisinnaassaguniuk eqqagassanik toqunartutalinnik aamma avatangiisinut ulorianartunik akulinnik piiaaqqullugu, taava nammineq uulianit akuutissallu eqqagassartaannut maleruagassiortariaqarpoq, peersinneqarnissaannut aamma tiguneqarnissaannut aaqqissuussaqarluni kiisalu ingerlatsivimmut killilersuutinik nalunaaruteqarluni.
* Uulianik assartuussuaq Kalaallit Nunaata sineriaani ajunaassagaluarpat mingutsitsillunilu, kommuni ajunaarfigisaa immaqa 6.000 kilometerit sinnerlugit sinerialik nammineq saliinissamut akisussaassaaq.
* Kalaallit Nunaanni pisortat akuersippata, nunanit allanit aatsitassarsiortut Narsap eqqaani Kuannersuarni aatsitassanik qaqutigoortunik akulinnik piiaasinnaasut, illoqarfimmi innuttaasut radiop qinngornerinik akulinnik pujoralattaqarsinnaasumi inuusussat akuersissut pillugu naammagittaalliornissaminnut periarfissaqanngillat.
* Ellen Margrethe Bassep tikkuarpaa avatangiisinut inatsimmi mianersornissamut ileqqussamik amigaateqartoq Ingeniørimut oqarluni, aatsitassat pillugit inatsit avatangiisit ajornartorsiutissarigaa angisooq.