- Uuliasiornermi uumasut ulorianartorsiortut nungutaasinnaapput

Namminersorlutik Oqartussat avatangiisinut siunnersuisoqarfiata DCE-p mianersoqqussutigaa Nunatta imartaani uuliaarluerneq kinguneqapilussinnaasoq

Namminersorlutik oqartussat namminneq avatangiisit pillugit siunnersortaat, DCE, siunnerfittut avatangiisit pillguit naliliinermi mianersoqqussutigaa Kalaallit Nunaata eqqaani uuliakoortoqassagaluarpat ajorluinnartumik kinguneqarsinnaasut. Assi: Leiff Josefsen

Nunatta imartaani uuliamik gas-imillu ujaasinermut, qalluinermut tunisassiornermullu Lloyd-imi Norsk Veritas-imilu sillimmasiinermut immikkut ilisimasallit siusinnerusukkut mianersoqqussinikuupput.

Maannalu namminersorlutik oqartussat namminneq avatangiisinut aatsitassanullu siunnersuisoqarfiat DCE Nunatta imartaani uuliaarluernerup kinguneqapilussinnaaneranut mianersoqqussuteqarpoq, taamatut allappoq atuagassiaq Ingenøren.

Aarhus Universitetimi DCE-p, Nationalt Center for Miljø og Energi-p (siusinnerusukkut DMU), Labradorhavet-ip nunatsinnut atasortaani Davisstrædillu kujammut kangisissuani uuliamik gas-imillu ujaasinissami avatangiisinut naliliinini siulleq tamanut saqqummiuteqqammerpaa.

Ilisimatuut nalunaarusiaanni ersarissumik mianersoqqussutigineqarpoq issittumi pisuumi sunnertiasumilu kulbrintisiornerit kinguneqapilussinnaasut.

Atuaruk "Arktisk Rådip Issittumi uuliamut isumannaarinissaq piumasaraa"

Atuaruk "Uuliasiornermik ingerlatsivissuaq: Issittumi kuulti qernertoq unitsissiuk"

Artinik tamavinnik piuneerutsitsisinnaavoq
Tassaasinnaapput immap timmiai issimik, kaammik ipillutilluunniit toqorartut, arferit soqqallit toqunartoqalersut, puisit piaraat amermik uuliaqalerneranik toqorartut, aalisakkat soorlu ammassat, nipisat, saarulliit eqaluillu aammalu raajat, peqquit uillullu ikileriarujussuartut kiisalu qaammaterpassuarni aalisarnerup uninnganerani aningaasatigut kinguneqaatissat, aammalu - ajorluinnassappat - artit tamavikkaarlutik piuneerussinnaallutik.

Uuliasiornermut atatillugu avatangiisinut kingunerlutsitsinerpaajusinnaasoq tassaavoq uuliaarluernerujussuaq. Tamanna pisinnaavoq qillerinermi, blowout-imik taaneqartartumik, imaluunniit uuliamik uninngasuutinik assartuinermiluunniit ajutoornerit, Ingeniøren allappoq.

Ullumikkut qaqutigoortuugaluartoq ajutoornerit pinngitsoortinneqavissinnaanngillat, avatangiisinut naliliinermi allassimavoq, naliliinermilu tamatumani tunngaviupput paasissutissat tamanut saqqummiunneqarsimasut saqqummiunneqarsimnanngitsullu, aammalu avatangiisinut kinguneqaatissanik nutaamik misissuinerit.

Powered by Labrador CMS