- Kalaallit Nunaanni aatsitassat inunnut aalajangersimasunut taamaallaat periarfissiissanngillat

- Kinguariarneq

Taamannak naliliivoq Transparency Greenland aatsitassarsiorfinnut angisuunut inatsit neqerooruteqartarnermut inatsimmut naleqqiullugu.

Suliniaqatigiiffik naapertorlugu tamanna isumaqarpoq pisortat paasiniaasinnaanerat mattunneqassasoq kiisalu aalajangiinernik ingerlatsinissat, aalajangikkanut tunngavilersuutit aamma aatsitassarsiorfinnut angisuunut pilersitsiniarnerni sanaartornerit nakkutigineqarsinnaajunaartut.

Transparency Greenland aatsitassarsiornermut inatsisip tusarniaassutigineqarneranut atatillugu akissuteqaammi allappoq, naak pisortat aningaasaataat assersuutigalugu umiarsualivinnik, mittarfinnik aqqusinernillu sanaartornermi atorneqarnavianngitsut taamaattoq pisortat pigisaannik atorneq eqqartorneqartoq, soorlu nunaminertat, illoqarfiit immikkoortortaat imaluunniit nunap ilaanni immikkoortortat.

- Inuiaqatigiit tunngaviatigut pisinnaatitaapput pilersitsiniaalluni sanaartornerit malinnaaffigissallugit. Taamaattumik innersuutigineqarpoq inatsisissatut siunnersuummi ilanngunneqassasoq annerusumik inuiaqatgiinnut saqqummiussisoqartarnissaannik ileqqussaq, Transparency Greenlandip siulittaasua, Anders Meilvang.

Blankocheck Naalakkersuisunut

Transparency Greenlandip aamma innersuussutigaa piumasaqaasiortoqassasoq, ingerlatseqatigiiffiit pilersitsiniartut sulilluarsinnaasumik naammagittaalliorfimmik pilersitseqqullugit.

Suliniaqatigiiffiup tikkuarpaa inatsisissatut siunnersuutikkut Naalakkersuissut blankocheckimik tunineqassasut.

- Inatsisissatut siunnersuummiipput aalajangersakkat arlallit, taakkua Naalakkersuisunit sukumiinerusumik piumasaqaasusiorneqartussat aalajangersorneqartussallu aatsitassarsiortunut atuuttussat.

- Piumasaqaatit taakkua suliamut killiffinnullu assigiinngitsunut tunngatillugit erseqqissarneqassapput. Taamaattoqanngippat aarlerinarsinnaammat nakkutilliinermik ingerlatsinertaqanngitsumik imaluunniit tunngavilersuutit eqqarsaatigilluagaanngitsut aallaavigalugit aalajangiisoqartarnissaa, Anders Meilvang tikkuaavoq.

Qanoq iliuuseqarnissat amigaataapput
Meilvang aamma isumaqarpoq, isumaqatigiissutit unioqqutinneqarneranni qanoq iliuuseqarnissanut periarfissanik amigaateqartoqarpoq.

- Pisussaaffituaq ataaseq tassaarpasimmat ingerlatsiviit allannguummik Naalakkersuisunut ilisimatitsinerat. Taanna qanoq iliuusissatut taaneqarsinnaasunganngimmat.

- Isumaqatigiissutit unioqqutinneqarnerinut atatillugu qanoq iliortoqartassanera aalajangersaavigineqanngilaq, Anders Meilvang nassuiaavoq.

Tupinnarlunilu eqqarsarnartoq

Kiisalu Transparency Greenlandimit eqqumiigineqarpoq inatsisissatut siunnersuut ingerlatsivinnut namminersortunut aatsitassarsiornissamik soqutiginnittunut tusarniaassutigineqassalluni nassiunneqarmat. Tamanna qaqutigoorpoq aamma eqqarsarnarluni.

Transparency Greenlandip tusarniaanermi akissutaa qallunaatooq tamakkiisoq naqqani atuarsinnaavat.