Qeqertarsuarmiut: Jens B. qaagit

Qeqertarsuarni innuttaasut piumaqaatigaat Angallannermut naalakkersuisoq Jens B. Frederiksen illoqarfimmut tikilluni angallannermut pissutsinik nammineq isini atorlugit paasianiaaqqullugu

Ineqarnermut, Attaveqatigiinnermut Angallannermut Naalakkersuisoq Qeqertarsuarmi innuttaasunut angallanneq pillugu nassuiaajartoqqullugu aggersarneqarpoq. Assi: Jørgen Chemnitz

Qeqertarsuarmi Atuisartut Ataatsimiititaliaanni oktoberip qulingani ataatsimiinnermi Qeqertarsuarmit Qeqertarsuarmullu angallanneq oqaluuserineqaqqippoq, tassanilu angallannermut isumaqatigiissut nutaaq januaarip aallaqqaataani atuutilertussaq ilaatigut akuersaarneqarsinnaannginnerarlugu nalilerneqarpoq.

- Taamaammat makku tunngavigalugit Angallannermut Naalakkersuisoq Jens B. Frederiksen, Qeqertarsuarmi innuttaasunut piaartumik nassuiaajartornissaa kissaatigaarput, ataatsimititaliaq ammasumik allappoq.

Aggersaanermut tunngavilersuutigineqartut arlaqarput, ilaatigut makku tunngavilersuutigineqarput:

· Septembarip aallaqqaataanit ullumikkut ulloq manna tikillugu, sinersortaateeraq minnerpaamik arfineq-marloriarluni imarlunnera pillugu tikinngitsooreerpoq. Allamillu Qeqertarsuarmit imaluunniit Qeqertarsuarmut aqqutissaqartoqanngilaq

· Najaaraq Ittuk aamma Aviaq Ittuk erniartortunik, napparsimasunik allanillu pitsorluttunut angallassinissaminnut tulluutinngilluinnartuupput

· Air Greenland aamma Disko Line unissimatillugit kinguaattoorsimatillugilluunniit angalasunut unnuisariaqalertunut akiliussiumanngittarneri

· Qeqertarsuarmit Ilulissanut killormulluunniit sinersortaateeqqamik angalaneq allaat maanna 9 tiiminik sivisutigisartoq, imaq ajortillugu angalasut toqqissillutik inissaqartinneqanngillat innangaffissaqaratillu

· Timmisartuaqqamik ingerlassinermi makku ingerlanneqartarnissaat qularutissaanngilaq: Nioqqutissat asiujasut, allakkat poortukkallu, timersortartut arlalikkaat. Taakkuinnaalluunniit eqqaallugit timmisartoq atorneqartussaq naammanngilaq

Ataatsimiititaliap aggersaanerani siulittaasup naggasiinermini, Qeqertarsuaq naalakkersuisunit tikinneqartarnissaa ornigineqanngitsigisoq apeqquserpaa.

- Ilanngullu aamma eqqaarusuppara, sooq illoqarfipput naalakkersuisunit tikinneqarnissaanut taama ornigineqanngitsigisarnersoq, tassaavugummi atuisartut ilissinnik naalakkersuisunit tikinneqarnissatsinnik pingaartitsilluinnartut. Allatullumi atuisartuugatta, ataatsimiititaliami siulittaasoq Erene Mølgaard allappoq.

Powered by Labrador CMS