IA-p siunnersuutaa: AGF nutaamik aningaasaliiffigalugu
Juliane Henningsenip siunnersuutigaa Arctic Green Food Namminersorlutik Oqartussanit taamaallaat tapiiffigineqartassasoq tunitsiviit ataasiakkaat ammagaangata ingerlatsigaangatalu
IA-meersoq Juliane Henningsen naapertorlugu Ittoqqortoormiini Arctic Green Foodip tunitsivia ukioq ataaseq sinnerlugu ammasimanngilaq.
Taamaattumik isumaqarpoq tunitsiviup matoqqanera matoqqagallarnermik taaneqarsinnaajunnaartoq.
Taamaanneralu illoqarfimmiunut tamanut nikallunganaqaaq, Juliane Henningsen oqarpoq, taamaattumik Namminersorlutik Oqartussat Arctic Green Foodimik sullissinissamik isumaqatigiissutaa allanngortikkusuppaa.
- Eqqarsaatigisariaqarparput Arctic Green Foodimut tapiissuteqariaaserput. Tunitsivimmik matusigallartarneq selskabimut malunnaateqassaaq, taanna Sermitsiaq.AG-mut oqarpoq.
Taassuma siunnersuutigaa taxameteritut aaqqissuussisoqassasoq, tassa selskabi Namminersorlutik Oqartussanit taamaallaat tapiiffigineqartassasoq tunitsiviit ataasiakkaat ammaneranni ingerlatsinerannilu.
Mimi Karlsenip Arctic Green Foodimik isorinninnera atuaruk: "Akuerineqarsinnaanngilaq"
Atuaruk "Arctic Green Food imminut illersorpoq"
- Arctic Green Foodip sullissinissamik isumaqatigiissut sumiginnarpagu isumaqarpunga innuttaasut akileraarutitigut aningaasaataat selskabip aningaasalerneranut atorneqassanngitsut, taanna oqarpoq.
Juliane Henningsen naapertorlugu tunitsiviup ukioq ataaseq sinnerlugu matoqqanera Ittoqqortoormiunut sunniuteqartorujussuusimavoq.
- Nikallunganaqaaq. Sumilluunniit nalunaarfigineqarneq ajorpugut. Matoqqanera sunniuteqartorujussuusimavoq, aamma piniartut isertitassaminnik annaasaqarnerannik, qilalukkanik umimmannillu tunisisinnaagaluaramik, taanna oqarpoq.