Arctic Green Food imminut illersortoq

Arctic Green Foodip tunitsiviinit aqqaniliusunit arfineq-pingasut matoqqanerat akuersaarneqarsinnaanngilaq. Taamaattumik Namminersorlutik Oqartussat kiffartuussinissamut isumaqatigiissutip unioqqutinneqarsimanera tunngavigalugu aningaasanik utertitseqqullutik piumasaqarsinnaanersut misissorneqassaaq, aalisarnermut piniarnermulllu naalakkersuisoq ane Hansen, IA, ullumi siusinnerusukkut oqaaseqarpoq.

Arctic Green Foodilli kiffartuussinissamut isumaqatigiissut malippaa Ane Hansenillu aningaasanik utertitsisoqarnissaa naatsorsuutigissanngilaa, Arctic Green Food akissuteqarpoq.

Læs "- Det er meget uacceptabelt"

- Kiffartuussinissamut isumaqatigiissut malipparput aamma aningaasanik utertitsisoqarnissaa naatsorsuutigissanngilaa, tunisassiornermut pisortaq Otto Stach Sermitsiaq.AG-mut oqarpoq erseqqissaatigalugulu tunitsiviit sapinngisamik amerlasuut ammatinniarlugit tamaviaartoqartoq.

- Tunitsiviimmi amerlanersaat ukiuunerani aalisakkanik panertiterinissamut ammaqqipput, Otto Stach oqarpoq, taamaalillunilu tunitsiviillu aqqaniliusut ilaasa arfineq-pingasut matoqqanerat akerlilerlugu.

Amigartooruteqartut
Taanna erseqqissaalluni oqarpoq Arctic Gren Foodip aningaasaqarnera ilungersunartoq tunitsivinnillu matusigallarneq ilaatigut nipisat suaasa tarajortikkallu nunarsuarmi akiisa appasippallaarnerannik pissuteqartoq - aalisakkallu assigiinngitsut tunineqartarnerat amigartooruteqarfiusumik ingerlanneqartoq.

Nunani allani akit appariapiloornerannik tamanna pissuteqarpoq, Arctic Green Foodillu tunitsivinnik matusigallartariaqarneranut pissutaalluni.

Ane Hansenip tusagassiuutitigut Arctic Green Foodimut isornartorsiuinera Otto Stachip aamma tupaallaatigaa.

- Isumaqarpunga Ane Hansen tusagassiuutitigut taamatut pasilliilersinnani eqqarsarluaqqaartariaqartoq, Otto Stach oqarpoq erseqqissaallunilu tunitsiviit matoqqasut pillugit Arctic Gren Foodip aamma Ane Hansenip akornanni toqqaannartumik oqaloqatigiittoqarsimanngitsoq.