Aatsitassanut Pisortaqarfik isorineqaqisoq
Nunatsinni atorfillit suliniussuarnik tusarniaanerni suleqataasutut isigisariaqarput. "Tuniniaavimmik nuannartorinninneq" qimanneqassaaq, Avataq oqarpoq
Sapaatip akunnerani kingullermi ICC-p præsidentia Aqqaluk Lynge oqarpoq aatsitassanik ingerlatsineq nunatsinni namminersorlutik oqartussanut ajoqutaasinnaasoq ilanngullugulu aatsitassanut pisortaqarfik sakkortuumik isornartorsiorlugu. Isornartorsiuinerlu tamanna avatangiisinik illersuiniaqatigiiffimmit Avamit ilalerneqarpoq, taanna ICC-tulli isumaqarluni suliniussuit ilaat utaqqitinneqartariaqartut.
Aqqaluk Lyngep isornartorsiuinera atuaruk uani: "Namminersorlutik Oqartussanut ajoqutaasinnaasoq"
Avatamulli pingaartumik qitiuvoq nunatsinni atorfillit aaqqissuussiffigeqqittariaqartut, sulittaasoq Mikkel Myrup malillugu suliassaminnik isumaginnissimanngitsut:
- Atorfilinni nuimanerpaat akornanni sammineqartorujussuuvoq qanorluunniit pisoqaraluarpat suliniutit tamakkua aallartinneqarnissaat. Takussutissaqanngilarlu atorfillit unikaallannissaat, innuttaasut amerlasuut malinnaasinnaanngikkaluartut malinnaajumanngikkaluartullu, Avatap siulittaasua Mikkel Myrup Sermitsiaq.AG-mut oqarpoq, erseqqissarpaalu atorfillit - siunertartik akerleralugu - tusarniaanerni suleqataasutut isigineqartariaqartut.
Taamaattumik atorfilinni aaqqissuusseqqinnissaq pisariaqarluinnarpoq, Avataq isumaqarpoq.
Matoqqasut paasissutissiinngitsullu
- Atorfillit nuimanerpaat pissaaneqarpallaaqaat ilisarnaatigaallu matoqqaneq paasissutiinerlu ajorneq. Siunnersuisorpassuit suliassinneqartartut ilanngullugu isigineqartariaqarput tuniniaavimmik nuannaartorinnittutut, Mikkel Myrup oqarpoq erseqqissarlugulu politikerit atorfillit pissaanillit taarsertariaqaraat, tamakkua uparuaatinut "misiartarmata tusaanngitsuuinnartarlutilluunniit".
Oqarporli "Ajoraluartumik takussutissaqanngivippoq politikerit atorfilinnik aaqqissuusseqqinniarnerannut".
Aatsitassanut Pisortaqarfiup marlunnut avinnissaanik isumassarsiaq - aatsitassanik aqutsisoqarfimmut avatangiisinullu aqutsisoqarfimmut - pappialami isumassarsiatsilaavoq, inernerali naammaginanngilaq, Mikkel Myrup oqarpoq.
Anguniaqanngeqisoq
- Iilmanarpoq avatangiisinut aqutsisoqarfik marlunnik sulisoqassasoq 1,2 millioner koruuninillu atugassaqartinneqarluni. Tamanna anguniagaqanngitsorujussuuvoq pisuusaarnertullu isikkoqarluni, Avatap siulittaasua isornartorsiuivoq.
Taamaattumik isumaqarpoq aatsitassanut Naalakkersuisup Ove Karl Berthelsenip, IA, Naalakkersuisunullu ilaasortat allat aatsitassanut tunngasumik suliassat naammattumik pitsaassusilimmik kivissinnaasimanngikkaat.
- Suliap ingerlanneqarnerani innuttaasut piginnittunngortinneqarsinnaasimanngillat, Mikkel Myrup oqarpoq, isumaqarporli politikkimi nukiit nutaat aaqqiissutissaanngitsoq:
- Iluaqutaanavianngilaq Ove Karl Berthelsenip taarserneqarnera. Kinguraartuata ajornartorsiutit taakkorpiaat pissavai, pisariaqartumik aaqqissuusseqqinnerit ingerlanneqanngippata. Takujuminaatsipparalu nunami maani politikerip kia tamanna qunuginnginneraa, taanna oqarpoq.
Sapiillisariaqarput
Imaanngilarli Avataq Mikkel Myrupilu tunniutiinnartut:
- Politikerit sapiilleqqullugit kajumissaartuartariaqarpavut, Mikkel Myrup oqarpoq.
Sermitsiaq.AG-mi siusinnerusukkut taasisitsinerup takutippaa atuartartut amerlanerussuteqarluartut ICC-p præsidentiata Aqqaluk Lyngep Aatsitassanut Pisortaqarfimmik isorinninnera isumaqatigigaat.
Sapaatip akunnerani kingullermi ICC-p aatsitasanut pisortaqarfimmik isorinninnerata kingorna Sermitsiaq.AG-p Ove Karl Berthelsen oqaaseqartinniarsimagaluarpaa, mannali tikillugu iluatsinngitsumik.
Taasisitsinerup titartaganngorlugu inernera tkuuk allaaserisami qullerpaamik assip tulliata ataaniittoq toqqarlugu.