Atuarfimmi eqqarnissamik sioorasaarineq tupassutaaqaaq
Odensemi Tietgenskolemut kalaallinut ilinniartunut aamma angerlarsimaffiusumut eqqarnissamik sioorasaarineq tupassutigineqaqaaq
- Klassi ilinniartitsiviusoq aagasaassaaq. Atuarfimmut eqqarnissamik sioorasaarineruvoq. Allahp najorlisitoq.
Pingasunngormat ullaakkut arfineq pingasut missaannit Odensemi Tietgenskolen ammarneqarmat allakkat sioorasaarutit taama nipeqarput. Taama oqaluttuarpoq ilinniarfimmi rektori Gitte Bargholt TV2.dk-mut oqaluttuarpoq.
Odensemi Kalaallit illuutaat naapertorlugu Tietgenskolen kalaallinut ilinniartunut arlaqanngitsunut ilinniarfiuvoq, rektorilli taakku qasserpiaanersut Sermitsiaq.AG-mut nalunaarutigisinnaanngilai.
Kalaallit Illuutaata erseqqissarpaa allakkat kalaallinut Tietgenskolenimi immikkoortortamiittunut arlaannaannulluunniit nassiunneqarsimanngitsut. Ilinniarfiup immikkoortuani Elmelundsvejimiittunut nassiunneqarsimapput.
- Allakkamik taamaattumik tigusaqaratta soorunami tupaqaagut. Atuarfinni eqqaasarnernit nunuarsuarmi pisartunit asserpassuit sarsuatinneqalersarput, Gitte BargholtFyens Stiftstidendep nittartakkami aviisianut fyens.dk-mut oqarpoq.
Pasisaqanngillat
Piffisami kingullermi ilinniarfimmi pisoqarsimanngilaq taamatut sioorasaarisoqarnissaanut pasinarsinnaasumik, oqaluttuarpoq.
- Ilinniarfimmi ilinniartut sulisullu nuannersunik atugaqarput, taamaattumi tamanna tupassutigeqaara, Gitte Bargholt aviisimut oqarpoq.
Ilinniarfik 1050-nik ilinniartoqarpoq tamarmillu angerlartitaapput ullup sinnera angerlarsimaannaqqusaallutik.
- Sioorasaarut tigugatsiguli politiinut sianipallappugut ilinniartullu mailikkut allaffigalutigik ullumikkut atuariartussanngitsut, Gitte Bargholt oqarpoq.
Aqaluttuarpoq ullup sinnera paasiniarneqassasoq ilinniarfimmi ullut tulliuttut qanoq pitsaanerpaamik aaqqiivigineqarumaarnersut.