Puatsigut kræftimut sakkussaq nutaaq
Qinngornerit atorlugit puatsigut kræftimut katsorsaariaatsimik nutaamik ilisimatusartut qallunaat Israelimiullu nassaarput
Kræftip akiorneqarnerani sukumiinerusoq kingunerlutsitsinannginnerusorlu. Qallunaat Israelimiullu ilisimatusartut suleqatigiinnerisigut puatsigut kræftimik katsorsaasarneq siunissami allanngortinneqarsinnaavoq.
Puanni kræftimik katsorsaanermi qinngornernik atuisarnermut periutsimik nutaamik ilisimatusaqatigiit nassaarsimapput. Periutsimi nutaami qinngornerit atorlugit katsorsaanermi kingunerlutsitsinerit ajornersaat pinngitsoorneqarsinnaalissapput.
Taama Israelimi nittartakkakkut aviisi The Times of Times allappoq.
Qinngornerit kræftimik katsorsaariaatsitut atugaasorujussuupput, qinngornernillu kræftcellit navianartut sukumiisumik toqorarneqartaraluartut timip sananeqaataasa ajoquteqanngitsut ilaat aamma aserorneqartarput.
Periutsimili nutaami kræftcellit eqqorniarlugit qinngornerit immikkuullarissumik takissusilinnik maligaasallit atorneqarput, tamannalu timip sananeqaataanut ajoquteqanngitsunut ajoqutaannginnerusoq paasinarsisimavoq.
Tamanna Ariel University Centerimi misileraanernit takutinneqarpoq.
Læs også "Kampen mod kræft bliver styrket herhjemme"
Katsorsaanermi cellit ajoquteqanngitsut annikinnerusumik ajoquserneqartarmata katsorsaasartut kræftcellinut akiuiniarnermi sukumiinerusumik periuseqarsinnaalerput tamakkualu sunniuteqarnerujussuarmik nungusarneqarsinnaalerlutik.
Puatsigut kræftertut kræftertunit allanit kemomik katsorsarnissaat ajornakusoornerusarpoq. Puaallu sananeqaataasa ajoquteqanngitsut aserorterneqartarnerat pissutigalugu qinngornerit sakkortuut aamma atorneqarsinnaasarsimanngillat.
Katsorsaariaaserlu nutaaq aqqutigalugu puammikkut kræftertut sunniuteqarnerusumik katsorsarnissaannut periarfissanik nutaanik takkuttoqarsinnaavoq.
Ilisimatusartut Carlsbergfondimit aamma Eva og Henry Frænkels Mindefondimit aningaasaliiffigineqareerput.
Ilisimatusaqatigiit ilaatigut tassaapput qallunaaq ilisimatusartoq fysikeri Henrik Bohr kiisalu Israelimiut fysikerit Konstantin Komoshvili, Jacob Levitan, Asher Yahalom, ingeniør Boris Kapilewitch aamma doktor Stella Aronov.