Immap itissusaanik uuttortaaneq: USA ikiuuttariaqarpoq

Kalaallit Nunaanni immap itissusaanik uuttortaaneq pillugu marlunngornermi Folketingimi isumasioqatigiinnerup kingorna avatangiisinullu ministerip Ida Aukenip Siumumeersumut Doris Jakobsenimut tamatumani USA-p suleqatigineqarsinnaaneranik apeqqutaanut akissutaa tunngavigalugu USA-p ikiuunnissaq pillugu toqqaannartumik piumasaqarfigineqarnissaa Doris Jakobsenip kissaatigilerpaa.

Taama pisoqarpoq Folketingimi isumasioqatigiittoqarnerani Danmarkip sukkanerusumik uuttortaanissamut periarfissaqannginnera pillugu Ida Auken saqqummiussaqareersorlu. Immap itissusaanik uuttortaanerup annertusarnissaanut Danmark aningaasaqarnikkut periarfissaqanngilaq, naak Avannaani Tunumilu uuttortaaneq amigaatilerujussuugaluartoq.

Tamatumani Danmarkip USA-mut atatillugu qanoq iliuuseqalersaannginnera taarsiulluguli nunat issittumiittumiittut namminneq uuttortaanernik qanoq ingerlatsisarnerat pillugu ataatsimeeqatigineqarnissaat avatangiisinut ministerip Siumut sinnerlugu Folketingimut ilaasortamut akissutaani ilanngullugu takutinneqarpoq.

Læs også "IA presser på for søopmåling ved Grønland"

Læs også "Jens B.: Sejladssikkerhed er vigtigst"

Læs også "Vores hav er et sort hul"

Pilliuteqartariaqartut
- Ministeriuneq Helle Thorning-Schmidt præsident Obamamik ataatsimeeqateqartussanngormat qinnuigaara kissaat tamanna toqqaannartumik saqqummiuteqqullugu. Tamatumunnga tunuliaqutaasoq tassaavoq nunatsinni itissutsinik uuttortaanermut ikiuunneq USA-p Pituffimmi sakkutooqarfimmik missilinut illersuummut atuineranut 'akiliutitut' atortariaqaraa Siumumit sivitsortumi tikkuaasarsimanerput. Isumaqatigiissut taanna Kalaallit Nunaata maannamut annertunerusumik pissarsissutiginngilaa.

- Avatangiisinut ministeri uannut akissutimini ammasumillu isumasioqatigiittoqarnerani akissutimini oqarpoq uuttortaaneq suli sukkanerusumik ingerlanneqarsinnaanngitsoq akisuallaammat, naak siku siornatigumut sanilliullugu sukkanerujussuarmik aakkiartoraluartoq, taamaattumik USA ikiuuttariaqarpoq. Sakkutuut umiarsuaannik atortunillu pisariaqartunik pigisaqarput, Pituffimmilu pisinnaatitaaffimminnut taartitut tamanna pissusissamisuussagaluarpoq atuinerminnut aningaasanik akiliuteqarumanngippata, Doris Jakobsen tusagassiuutitigut nalunaarummi allappoq.

IA sinnerlugu Folketingimut ilaasortaq Sara Olsvig Kalaallit Nunaata imartaani isumannaallisaanerusoqarnissaanik aamma sukataarutiginnippoq. Doris Jakobsenitulli imaani itissutsinik uuttortaaneq sivitsortumi pingaartissimavaa.