Politiit atortittartut pillugit ilisimasaqanngillat

Pinerluttulerinermi inatsit naapertorlugu inuit 18-it inorlugit ukiullit akilerlugit atoqatigiinissaat inerteqqutaavoq. Aamma akiliilluni arneriniartarfinnik ingerlatsinissaq inerteqqutaavoq

Assi: Leiff Josefsen

- Politiit nunatsinni atortittartunik imaluunniit arneriniartarfinnik ingerlatsisoqarneranik ilisimasaqanngillat.

Taama oqaluttuarpoq Kalaallit Nunaanni politiini pisortaaneq Claus Risbjerg.

Taamak oqarpoq Sermitsiaq.AG.-mut, ulluni kingullerni arneriniartarfinnik aamma atortittartunik oqallittoqarneranut atatillugu. Oqallinneq aallartippoq Maniitsumi hoteliutillip Søren Lyberthip akuersaartumik nipeqarluni arneriniartarfinnik pilersitsisoqarsinnaanera eqqaammagu, kinamiut tusindit arlallit Maniitsup eqqaani Alcoamik suliniummik suliartortinneqarnissaannut atatillugu.

Kalaallit Nunaanni pinerluttulerinermi inatsimmi paragraf 81 aamma 82 naapertorlugit inerteqqutaavoq inummik aningaasanik akiliilluni atoqateqarnissaq. Aamma inuit 21 inorlugit ukiullit atortittartutut aningaasarsiuteqarnissaat kaammattuutigeqqusaanngilaq.

Tunngavissaq: Pinerluttulerinermi inatsisit 81 + 82

"§ 81. Atoqatiginninnissamut saasaarisutut eqqartuunneqassaaq kinaluunniit ukiumigut misilittakkamigullu inersimanerunerminik peqqarniitsumik atornerluilluni inummik 18-it inorlugit ukiulimmik kujannittoq, pinerluuteqartup nalusimanngippagu pineqartoq qassinik ukioqartoq imaluunnit tamatuma tungaatigut mianersuaalliorluni iliorsimaguni.

§ 82. Aalajangersakkat §§ 77-81-imiittut taamatuttaaq atuutissapput kimuulluunniit suiaassuseqatiminik kinguaassiuutitigut atoqatiginnittumut.

§ 83. Iluanaarniutigalugu atortittartuutitsinermut eqqartuunneqassaaq kinaluunniit

1) peqqusersiorfiginnilluni allanik kinguaassiuutitigut inuunerloqateqarnikkut iluanaaruteqartitsiniaasoq,

2) iluanaaruteqarnissaq pissutigalugu peqqusersiorfiginnilluni allanik kinguaassiuutitigut inuunerloqateqartitsisoq imaluunniit kinguaassiuutitigut inuunerlunnermik inuussutissarsiuteqartup taamaaliorneranik soraarussinnaveersaaliuisoq, imaluunniit

3) atortittarfiutilik.

Imm. 2. Taamatuttaaq pineqassaaq kinaluunniit inummik 21-t inorlugit ukiulimmik kinguaassiuutitigut inuunerlunnermik inuussutissarsiuteqarnissamik kajumissaarisoq ikiuisorluunniit, aamma kinaluunniit inuup Kalaallit Nunaanniit aallarneranut peqataasoq, aallartoq allami inuunerlunnermik inuussutissarsiuteqassammat imaluunniit inuunerlunnermut taamaattumut atorneqarpat, aallartoq 21-t inorlugit ukioqarpat imaluunniit aallanerminut siunertaasoq ilisimanngippagu.

Imm. 3. Aammattaaq eqqartuunneqassaaq kinaluunniit kinguaassiuutitigut inuunerlunnermik siuarsaasoq iluanaaruteqarnissaq pissutigalugu imaluunniit akuttunngitsumik arlaleriarluni akunnermiliuttuusartoq imaluunniit allap kinguaassiuutitigut inuunerlunnikkut inuussutissarsiorneranik atornerluisoq.

Imm. 4. Taamatuttaaq pineqassaaq kinaluunniit akunnittarfinni imaluunniit unnuisarfinni inimik attartortitsisoq kinguaassiuutitigut inuunerlunnikkut inuussutissarsiuteqarnermut atugassamik.

Powered by Labrador CMS