Nive: Nuannaarlungalu tulluusimaaqaanga
Nive Nielsen kunngissakkunnit Frederik aamma Marymit nersornaatit Stjernedrys-prisit marluusut aappaannik arfininngornermi unnukkut tunissuteqarfigineqarami nersualaarneqarluarpoq
- Kunngissamit kronprinsessemillu nersornaammik tunineqarnera uannut ataqqinaaterujussuuvoq. Nuannaartorujussuuvunga.
Taama Nive Nielsen piorsarsimassutsikkut nalliuttorsiornerujussuup kunngissakkut arfininngornermi unnukkut Sønderborgimi piorsarsimassutsikkut illorsuarmi Alsionimi nersornaatiminnik agguareersullu aqaguani Sermitsiaq.AG-mut oqaluttuarpoq.
Nive Nielsenip nersornaaserneqartussaanini qaammammi ataatsimi isertugaatigisimavaa.
- Qaammatip ataatsip matumasiorna sianerfigineqarlunga aperineqarpunga nersornaat 'Stjernedrys-prisen' tigorusunneriga, taamaattumik tamanna sivitsortumi isertugaatigisimavara. Nuannaartorujussuuvunga, Nive Nielsen oqaluttuarpoq, nersornaatinillu agguaassisoqareermat peqataasut tamaasa nuannateqatigineqarneranni kunngissamik Frederimmik oqaloqateqarnissamut periarfissaqarsimanerarluni.
Læs også "Nive fik kronprinsparrets Stjernedrys-pris"
- Nersualaartorujussuuvaanga, aamma uanga nersornaat pillugu qujarujussuarpunga. Uannut angeqaaq, aamma kunngissap uannik nipilersoqatigisannillu eqqarsaatiginnissimanera tulluusimaarutigisorujussuuara, Nive Nielsen oqarpoq, aningaasallu cd-mik nutaamik ukiup nutaap aallartinnerani saqqummersussamik immiussinermut atorneqarnissaat naatsorsuutiginerarlugu.
Nive Nielsen ilanngullugu oqaluttuarpoq ulloq Tysklandimi sapaatip-akunnerini marlunni tusarnaartitsiartorluni angalanissamut erinnanik sungiusarnermut atorsimagini, Tysklandimeereerunilu USA-mut Tuluit Nunaannullu angalassalluni.
- Kisianni decembarimi Nuummut uteqqinnissara naatsorsuutigilluinnarpara, Nive Nielsen oqarpoq.
Kunngissakkut nersornaasiuttagaat marluk Stjernedrys-prisinik taaneqartut Nive Nielsenimut aamma qallunaamut nutsugiartartumut Bjarke Mogensenimut tunniunneqarput. Nersornaatit eqqumiitsuliortunut inuusuttunut nutaaliortunut tunniunneqartarput.
Stjernedrys-prisen 50.000 koruuninik aningaasartaqarpoq.