Nunatta imartaanilk itissusersiuinissaq nukingisaarutigaa
Folketingip Illersornissamut Ataatsimiititaliaata marlunngormat avatangiisinut ministeri Ida Auken ataatsimeeqatigissavaa, nunami maani imaatigut isumannaatsuuneq oqaluuserissallugu
Folketingip Illersornissamut Ataatsimiititaliaa marlunngorpat ullaakkut avatangiisinik ministerimik Ida Aukenimik, SF, isumasioqatigiileruni Nunatta imartaani itissusersiuilluni uuttortaanissaq qitiusumik oqaluuserineqasaaq.
IA-p folketingimut ilaasortaatitaata Sara Olsvigip nuannaarutigaa Venstremeersup Troels Lund Poulsenip ataatsimiinnissaq tamanna suliniutigisimammagu, illersornissamut ataatsimiititialip ungasissorsuunngitsukkut Nunatsinnut angalaarnerata kingorna.
- Aqagu isumasioqatigiinnissaq qilanaarisorujussuuvara, nuannaarutigeqaaralu qallunaap Folketingimut ilaasortap sammisassaq tamanna soqutigimmagu. Pingaaruteqartorujussuuvoq Nunatta imartaani itissutsimik uuttortaanermi periusissap pitsaanerpaap nassaarineqarnissaa, taamaasilluni imaq annertunerusoq sukkanerusumik itissisersiorneqarsinnaassalluni, Sara Olsvig oqarpoq.
Aamma atuaruk "Jens B.: Imaani angasut isumannaatsuunerat pingaarnersaavoq"
Aamma atuaruk "Imartarput itissusersiorneqanngilaq"
Taassuma Nunatta imartaata itissusersiorneqarnissaa sivisuumik sammisimavaa. Januaarimi februaarimilu Sara Olsvig tamanna arlalinnik apeqquteqarfigaa, akissutinilu erserpoq Nunatta imartaata 20 procentiinnaata missaa itissusersiorneqarsimasoq, kiisalu itissusersiuinerit ilaat tutsuviginarpallaanngitsut. Akissutini aamma allassimavoq Nunatta imartaata itissusersiorneqarnerata annersaa ukiuni kingullerni 60-ini pisimasoq, aatsaalli 2003-p kingorna itissusersiuitit ekkolodip arlalinnik qinngornillit atorneqalersimasut, taamaallaat 50 centimeterimik uniuisinnaasut.