Nuna tamakkerlugu katersuiniarneq tapersersorneqarluartoq

Neriuffiit Kattuffiata sapaammi katersuiniarneranut atatillugu namminneq kajumissutsiminnik suleqataasut tapersersuilluarput. Nuummi katersuiniarnermi angalaarfissat tamarmik inuttassaqartinneqarput

Nuummi katersuiniarnermi ingerlaarfiit 37-nik amerlassuseqartut aatsaavissuaq tamakkerlugit inuttassaqartinneqarput. Asseq toqqorsivimmit: Sermitsiaq.AG

Neriuffiit Kattuffiata nuna tamakkerlugu katersuiniarnerani angusarineqartut qasserpiaanerat aatsaat sapaatip-akunnerata ingerlanerani kingusinnerusukkut paasinarsisussaagaluartut Nuummi katersuiniaqataajumasut tapersersuilluarnerat Neriuffiit Kattuffiata siulittaasuanit Johanne Olsenimit nuannaarutigineqartorujussuuvoq.

Aatsaavissuaq Nuummi katersuiniarnermi ingerlaarfissat 37-t tamarmiusut inuttassaqartinneqarput, illoqarfimmilu katersuiniarnermut inuit 40-t missaanniittut peqataapput.

Oqaatigineqareersutut nuna tamakkerlugu katersuiniarnermit pissarsiarineqartut suli ilisimaneqanngillat, Nuummili nakkaatitsiviit atorlugit katersuiniarnermi 81.000 koruunit missingi pissarsiarineqarput.

Johanne Olsen oqaluttuarpoq katersuiniarnermi aningaasat pissarsiarineqartut tamarmiusut siorna pissarsiarineqartunit amerlanerunissaat naatsorsuutigigini, kisianni annertuallaanngitsumik suliniaqatigiiffik siorna tunisisumit ataatsimit 50.000 koruuninik pissarsisimammat.

- Pingaartumik sila eqqarsaatigissagaanni angusarineqartut ajunngilluinnarput, Johanne Olsen Sermitsiaq.AG-mut oqarpoq.

Aningaasat katersorneqartut ilaatigut kræftertunut ilaqutaannullu tunissutinut tamarmik immikkut 3.000 koruuninik aningaasartalinnut atorneqassapput.

Powered by Labrador CMS