Nivép kunngissakkut Stjernedrys-pris'iat pissarsiaraa

Nuannannissarsuarmut aaqqissuussisoqarsimavoq 'Kronprinsparrets Priser' / ’Kunngissakkut nersornaasiuttagaannik’ Sønderborgimi tusarnaartitsisarfissuarmi Alsionimi arfininngornermi unnukkut agguaassisoqassammat, eqqumiitsuliortorpassuit akoranni Nivé Nielsen qaaqqusaaqataavoq.

Stjernedrysit nersornaataat marluk erinarsuusiortumut ernarsortartumut Nivé Nielsenimut aamma qallunaamut akkordeonimik nipilersortartumut Bjarke Mogensen tunniunneqarput.

Nersornaatit tunniunneqartarput eqqumiitsuliortunut inuusuuttunut marlunnut nutaaliortunut, aqqutit nutaat atorlugit eqqumiitsuliaminnik saqqummersitsinissaminnut qunugisaqanngitsunut.

Kalaaleq muteerniusoq
Nivé Nielsen nersorneqarpoq kalaaliugami muteerneq nunarsuaq tamaat tusarnaartitsiffissatut isiginnittaasilik. Bjarke Mogensen nersorniarneqarpoq klassiskemik aamma erinninnisaarnerusumik nipilersoriaatsini akkordeonip periarfissaanik qunusueqaluni sapiillunilu eqqumiitsuliortutut ingerlatsinini pillugu.

Nivé Nielsen, Nuummi inunngorpoq 1979. Indiemik nipilersortartuuvoq, nammineq erinniani taallianilu erinarsortarlugit. Nipilersugai arlallit filmini TV’milu atorneqarput, nunarsuaq tamakkerlugu festivalerpassuarni Nivép peqataasarpoq.

Stjernedrys-imik nersornaat 50.000 koruuninik aningaasartaqarpoq.

Nersornaatit allat
Nipilersortartut allat soorlu Efterklang Steffen Brandt aamma Nephew nersornaasiinermi nipilersorput, Louise Wolff saqqummiussisoralugu ingerlanneqartumi.

Meeqqanut atuakkiortoq titartaasartoq Jakob Martin Strid, Kronprinsparrets Kulturpris 2012 nersornaaserneqarpoq.

Atuakkiortoq nersornaaserneqartoq quijanartumik eqqumiitsumillu allaaserai ilaatigut "Mustafas Kiosk", "Lille Frø" aamma "Min Mormors Gebis".

Kulturikkut nersornaat 2004-mi pilersinneqarpoq kunngissakkut katinnerannut atatillugu Bikubenfondip tunissutaatut.

Eqqumiitsuliortunut inuusunnerusunut tunniunneqartarpoq, naalagaaffeqatigiinnerup iluani kulturimik ingerlatsinikkut immikkut ittumik saqqummiussisimasunut. Naatsorsuutigineqarpoq eqqumiitsuliortup siunissami nunami nunallu tamalaat akornanni siumukarnermik, nutaaliornermik aamma eqqumiitsuliornermut attuumalluinnartumik saqqummiussisarnissaat.

’Den Sociale Pris’ ukioq manna tunniunneqarpoq Ungdommens Røde Korsimut, inuusuttut kattuffiata inooqatigiinnermut tunngasutigut suliniutaat, meeqqanut inuusuttuaqqanullu sumiginnagaasimasut immikkut illuinnartumik suliniutaat.

Tusaamasat ajugaasut
Kulturikkut nersornaammik ajugaanikut allat ilaat tassaapput eqqumitsuliortoq Olafur Eliasson aamma illussanik titartaasartoq Bjarke Ingels.

Nersornaatinik tunniussinerup siulliup kingorna nersornaatit allat pilersinneqarput. Kronprinsparrets Kulturpris, tassaalerpoq Kronprinsparrets Priser, maanna ilaalerepoq Sociale Pris – (Inooqatigiinneq pillugu Nersornaat) – ataqqinninniut 500.000 koruuninik aningaasartalik. Stjernedrys-inik nersornaatisisut tamarmik 50.000 koruuninik tunineqarput.