Niaqornat filmiliarineqartoq
“Village at the End of the World” imaluunniit kalaallisuunngortillugu nunaqarfiit isorlerpaartaat – Kalaallit Nunaata Kitaani nunaqarfik Niaqornat pillugu filmiliaq Londonimi takutinneqassaaq
BFI London Film Festival ingerlanerani filmi “Village at the End of the World” takutinneqassaaq. Niaqornat kissalaartumik inuunerullu naleqassusaanik ersersitsisumik takutinniarneqarpoq, nunaqarfik mikisoq pinnerluinnartoq Kalaallit Nunaata Kitaaniittoq. Filmimi inuuneq ukiup aappaata affaani malittarineqarpoq, ersersinneqarluni, inuiaqatigiinnguit qanimut suleqatigiilernerat aalisakkanik tunisassiviup matusap – nunaqarfiup uummataata - ammarteqqinniarnerani. Suliaq Karl Kristianimik aqunneqarpoq taanna nunaqarfik pillugu qasusuilluni sulijuarpoq. Filmi qiimmaallannartuuvoq ersersitsilluni, inuiaat kalaallit nunaqarfimmi piniartoqarfimmi najugallit inooriaatsip nutaaliaasup sunik unammilligassaqartinnerai.
Ukiut marluk filmiliornermik ingerlatsinermi ilitsersuisoq Sarah Gavron aamma filmiliortoq David Katznelson Niaqornanik nuannarinnilersimapput, nunarsuarmi sumiiffiit pinnernersaasa ilaattut taagukkaminnik. Filimimi torrallataalluinnartumik immaq, sikut nunallu ataqqinarsillugit assilineqarsimapput, filmip imarisaanut tupinnaannartumik tunuliaqutitut illutik.
Nunarsuarmiut allat “Village at the End of the World” isiginnaartussat najukkami pisup iluatsilluartup oqaluttuassartaanik malinnaassapput. Filmimi inuit takusassat assigiinngitsuupput soorlu nunaqarfimmik isiginnittaasiat aamma assigiigani. Ilannguaq ukiut tallimat matuma siorna Kujataanit Niaqornaarsummut pivoq angerlarsimasutullu misigisimalluni. Nunaqarfiup aningaasaqarneranut ikiuukkusuttorujussuuvoq, ilinniartitsisoq Mathias peqatigalugu, umiarsuarnut takornariartaassuarnut ilaasut takornariartittarpai, takornariat aasat tamaasa nunaqarfimmut tikittarput. Niaqornani innuttaasut utoqqaanersaata tullia Ane Kruse qatanngutaalu Benigna qanga pissutsinut tarrarsuutitullusooq ipput. Inuit nunaqarfimmut tikillutik meeqqanik inersimasunillu qanga tamaani pisimasunik oqaluttuariartortartut oqaluttuarisarpaat.
Filmimi takutinneqartut pingaarnersaasa ilaanni piniartoq Karl Kristian malittarineqartarpoq, aalisariartoq imaluunniit sikukkut nannunniartoq. Taanna nunaqarfimmiut sinniiseraat, Michael peqatigalugu Niaqornat aamma Royal Greenlandip akornanni aalisakkanik tunisassiorfiup ammaqqinneqarnissaa isumaqatigiinniarput. Lars inuusuttuaraavoq inuunermini piffimmi allamiilluni. Taassuma aalajangertussaavaa nunaqarfimmi siunissaqassanerluni imaluunniit ilaquttani qimallugit illoqarfiit annerit ilaanni ilinniakkamik aallartitsissanerluni suliffissarsiussanerluniluunniit.
Kalaallit tulluussimaarutigisariaqarpaat filmimi pinngortitamik assilisat, sulili taamak oqaluttuamik ajunngitsigisumik imalimmik filmimi inuunermik ersersitsisumik takusoqartarpoq. Filmi oktobarip qaammataata ingerlanerani takutinneqaqqaassaaq London Film Festival pingaartinneqartaqisup ingerlanneqarnerani.