Tuusi: Inatsisartut nutarterlugit
Inatsisartut Folketingi ilinniarfigisinnaavaat, Inatsisartut siulittaasuat Josef Motzfeldt oqarpoq isumaqarlunilu qinngaqqunnanngitsumik eqqissisimasumillu oqallinneq Inatsisartut ilinniarfigisinnaagaat
Folketingip ammarnersiorneqarnera, naalagaaffimmilu politikkikkut ingerlatsiviit nuimanersaanni, Folketingimi, siulittaasumik siulittaasullu tullianik qinersineq pisarnertut akornuteqanngitsumik ingerlanneqarput.
Tamanna Kalaallit Nunaanni ilinniarfigisinnaavarput. Inatsisartut ullumikkut ammarnersiorneqarneranni misigisarparput oqallinneq siulittaasumillu toqqaanermik isornartorsiuineq. Periuserlu tamanna piffissaajaataallunilu nukissaajaataasarpoq nutarterneqartariaqarlunilu, Inatsisartut siulittaasuat Josef Motzfeldt, IA, taamatut isumaqarpoq, marlunngormat Københavnimi Folketingimi ammaanersiorneq peqataaffigereerlugu.
- Ministeriunerup ammaanersiorluni oqalugiarnissaanut ikaarsaariarneq qinngaqqunnanngitsumik eqqissisimasumillu pivoq. Siulittaasumik tullianillu qinersineq qinngaqqunnanngitsumik eqqissisimasumillu pipput. Tamanna Kalaallit Nunaata ilinniarfigisinnaavaa, Josef Motzfeldt Sermitsiaq.AG-mut oqarpoq.
Taamaattumik Inatsisartut siulittaasuat isumaaqarpoq isumaliutigineqartariaqartoq partiit Inatsisartuni siulittaasussamut inassuteqaateqartassanersut Inatsisartuni ammaanersiorneq sioqqullugu.
Aamma atuaruk "Nunarput Issittorlu Afghanistanimit siulliunneqarput"
Ammaanersiornermit: "Helle: Naalagaaffeqatigiinneq pisariaqarpoq"
Ataqqinninneq attallugu
- Takuavar Folketingimi partiit tamarmik siulittaasup inassutigineqaqqinnissaanik isumaqatigiittut. Tamanna qinngaqqunnanngitsumik ataqqinninnerlu attallugu pivoq, immikkoortoq taanna oqaluusereqqinnagu, Josef Motzfeldt oqarpoq.
- Akerlianik Inatsisartuni ammaanersiornermi misigineqarsinnaasarpoq siulittaasutut qinigassanngortitat isornartorsiorneqartut, tamatumanilu politikkikkut pissanganartuliortoqartariaqanngilaq. Taarsiullugu siulittaasoq ivertinneqartariaqarpoq ataatsimiititaliani ilaasortat ivertinneqartarnerattut, annertunerusumik persuarsiutaanngitsumik, taamaasilluni politikkikkut isummat politikkimik suliarinninnermi pisassallutik, Josef Motzfeldt erseqqissaavoq.
Aamma atuaruk "Inatsisartut: Nunami atorfiit ataqqinarnersaat qassiiliuutaasarpoq"
Josef Motzfeldtip nuannaarutigaa Helle Thorning-Schmidtip Kalaallit Nunaat eqqaagamiuk piviusumik taasaqarmat:
- Ministeriunerup Igaliku taavaa naalagaaffeqatigiit kingullermik ataatsimiiffiattut alianaalluinnartutut. Nuannerpoq Kalaallit Nunaanni sumiiffik piviusoq innersuussutigimmagu, Kalaallit Nunaat nalinginnaasumik eqqaaginnarnagu, Josef Motzfelt oqarpoq, taannalu naammineq Igalikumi inunngorsimavoq.