Inuusuttuaqqat angajoqqaatik takunerurorusuppaat

Aqagu arfininngornermi meeqqat 100-nik amerlanerit Nuummi "nilliaqatigiinniarput". Nakuusap sammisamut aalajangersimasumut filmiliassaanni arfineq-marlunni meeqqat peqataassaapput

Nakuusap inuusuttai ukioq manna siusinnerusukkut Nuummi ilaqutariinnermut, kultureqarnermut, ilageeqarnermut aamma naligiissitaanermut Naalakkersuisoq Mimi Karlsen assiliseqatigaat. Assi: Leiff Josefsen

Nakuusap suliniutissaa tulleq ”Suli anaanamik! Suli ataatamik!” qulequtaqarpoq ”Kalaallit Nunaannilu meeqqat atugarisaannik pisinnaatitaaffiinillu nukittorsaaniarluni pitsanngorsaaniarlunilu suliaqarnermut ilaalluni.

Suliniut novembarimi aallartittussap angajoqqaat akisussaaffii aamma meeqqat angajoqqaallu akornanni pissutsinik innersuussissaaq oqallinnermillu pilersitsissaluni.

Aqagu arfininngornermi meeqqat 100-nit amerlanerit Nuummi illoqarfiup immikkoortortaani Qaqortumi "nilliaqatigiissallutik" katersuuteqatigiissapput, meeqqat Nakuusap filmiliassaanni arfineq-marluusuni peqataassagamik.

Angajoqqaanut asanninnermik tusarliineq

Suliniut Nakuusapukioq manna ”angajoqqaat akisussaaffeqarnerannik” sammisamik suliaqarnerata sakkortunerpaaffigaa.

- Paasisitsiniaanerput tunngavippiaatigut meeqqanit angajoqqaanut asanninnermik angisuumik nipituumillu nalunaarutaavoq, tamatumani meeqqat oqarlutik ”asavassi – suli aamma perusuinnarpassi”, Unicef Danmark sinnerlugu Nakuusami sammisassanik aaqqissuisoq, Arnavaraq Jørgensen oqarpoq.

- Paasisitsiniaaneq piukkunnarsarniarlugu paasisitsiniaanermi periuseq suliamik ilisimasalinnut, angajoqqaanut meeqqanullu ilisaritissimavarput, tamatumanilu pitsaasumik qisuariarfigineqarluta tunniusimanerujussuarmillu naapitaqarluta. Paasisitsiniaaneq aqqutigalugu meeqqat oqariartuutaat nunamut tamarmut siammarniarpavut tamatumalu kingorna angajoqqaat akisussaaffeqarnerannut tunngasumik oqallinnermut inuiaqatigiit tamarmik peqataanissaat neriuutigalugu.

Paasisitsiniaanermi filmiliat arfineq-marluk novembarimiit KNR-ikkut aallakaatinneqartussat saniatigut paasisitsiniaaneq ilaatigut angajoqqaanut atuakkamik akeqanngitsumik imaqassaaq, taannalu meeqqat pisinnaatitaaffiinik suliniaqatigiiffik MIO suleqatigalugu suliaavoq.

Nakuusa aasap ukiallu ingerlaneranni suleqatissanik pilersitsiniarluni ilungersorluni sulisimavoq, ilaatigut suliffeqarfinnik, meeqqat oqariartuutaasa inuiaqatigiinnut sapinngisamik tamanut anngutsissinnaajumallugit.

- Kikkunnik tamanik suleqateqarnissarput kissaatigaarput tamatumanilu suliffeqarfiit, kattuffiit kikkullu tamaasa meeqqat pisinnaatitaaffiinik suliniutitsinnillu nukittorsaanissamik kissaateqartut saaffiginninnissaannik kaammaatorlugit, Nakuusa, suliniummut aqutsisoq, Klaus Møller, oqarpoq.

Nakuusa Kalaallit Nunaanni Namminersorlutik Oqartussat aamma UNICEF Danmarkip akornanni ukiuni tallimani suleqatigiinnissamik suliniutaavoq. Suliniummi pingaarnertut anguniagaq tassaavoq Kalaallit Nunaanni meeqqat atugarisaannik pisinnaatitaaffiinillu pitsanngorsaanissaq, pingaartumik isiginnittaatsinik sunniiniarnikkut.

Nakuusa 2011 pilersinneqarpoq 2015-illu naanissaata tungaanut ingerlassalluni.

Powered by Labrador CMS