Air Iceland Kulusumut timmisartuussineq ingerlatiinnassavaa
Islandimiut timmisartuutileqatigiiffiata ukiortaamit Kulusuk aamma Reykjavikkip akornanni timmisartuussineq ingerlatiinnassavaa. Illutangaani Nerlerit Inaanit Islandimut aqqut atorunnaassaaq
Air Icelandip Kulusumut aqqut aningaasarsiorneq aallaavigalugu ingerlatiinnassavaa, naak paasinarsereersoq namminersorlutik oqartussat 2013 aallarnerfigalugu Tunup Islandillu akornanni timmisartuussinernut aningaasatigut tapiinissaq kissaatiginngikkaluaraat.
- Tasiilami innuttaasut pitsaasumik oqaloqatigaagut, timmisartuussinerit siusinnerpaamik septembarip tungaanut ingerlassapput, tamatuma kingorna susoqarnissaa nalilissavarput. Upperaarput aningaasartigut kaaviiaartitsiffiusinnaassasoq pingaartumik takornariartitsineq eqqarsaatigalugu tamatuma saniatigut Tasiilamut nassiussanik assartuussineq ingerlapparput, Air Icelandimi tuniniaanermik ussassaarinermillu pisortaq Ingi Þór Guðmundsson oqarpoq.
Namminersorlutik oqartussat sumiiffimmi tapiutigisartagaata unitsinneqarnera illuatungaani isumaqarpoq, timmisartuutileqatigiiffiup aalajangersimasumik Nerlerit Inaannit Reykjavikkimut timmisartuussisarnini taamaatissagai.
- Kisianni timmisartuussinernik attartukkanik pisariaqartillugu ingerlatsisassaagut, Ingi Þór Guðmundsson oqarpoq.
Timmisartuutileqatigiiffik ukiortaamit maajip naanissaata tungaanut sapaatip akunneranut ataasiarluni Kulusup aamma Reykjavikkip akornanni sapaatip akunneranut ataasiarluni timmisartuussisassaaq, taamaattoq poorskikkunni sapaatip akunneranut marloriarluni timmisartuussissalluni.
Aasaanerani juunip aallaqqaataanit septembarip arfineq-pingajuat tikillugu Air Iceland ullormut marloriarluni timmisartuussisassaaq, septembarip qulingiluaannit septembarip 28-anut sapaatip akunneranut marloriarluni timmisartuussisassaaq.
Air Greenlandimit siusinnerusukkut aalajangerneqarpoq Kulusip aamma Icelandip akornanni timmisartuussinerit aningaasarsiornermik aallaaveqarluni ingerlanneqassasut, Air Icelandip timmisartuussinerit ingerlateqqikkumanngippagit.