Inissianut akiliut nuna tamakkerlugu qaffassaaq
Inissiat attartortittakkat akiisa qaffannissaat ukiup nikinneranit atuutsilissaaq - Naalakkersuisunut ilaasortat akiliutaat annerpaamik qaffaavigineqassapput
Inissianik piginnittut, Namminersorlutik Oqartussat aamma Qeqqata Kommuniata Qaasuitsup Kommuniatalu kissaatigivaat, 2013'mi januaarip aallaqqaataaniit atuutilertussanik ineqarnermut akit nutaat, INI'p piginnittut sinnerlugit, ineqartunut tamanut allagarsiissutigissagai.
Inissiat Kommune Kujallermit pigineqartut qanoq allannguuteqassanersut kommunimit aaliangiiffigineqareerpat ineqartunut piaarnerpaamik allakkatigut nalunaarutigineqarumaarput.
Inimit nalunaarut taamak nipeqarpoq.
- Maluginiaqquarput 2013-imut missingersuusiornerit ukiup siuliinut sanilliullugu allaanerussuteqarmata. Tassa ineqarnermut akiliutissat inissiap qanoq aserfallassimatiginera najoqqutaralugu aalajangerneqarmata. Namminersorlutik Oqartussat ineqarnermut nalunaarusiaanni allaaserineqarsimasutut illunik misissuisitsisimanerit aallaavigalugit Ineqarnermut akiliut immikkoortunut sisamanut agguataarlugu aalajangiisoqarpoq.
- Ineqartut immikkoortortaqarfii immikkoortutut namminersortutut ingerlanneqarput. Ineqarfiit allat aningaasatigut ingerlarngat immikkoortortat allat aningaasatigut ingerlanerinut sunniuteqanngimmata. Tamatuma saniatigut inissiamut akiliutip immikkoortortami najugaqarfigisami aningaasartuutinik taamaallaat matussusiisussaammata, Inimi attaveqaqatigiinnermut pisortaq Else Løvstrøm oqarpoq.
Naalakkersuisut qaffaaffigineqarnerpaajupput
Ineqarnermut akiliutit qaffaaffigineqarneranni Nalakkersuisunut ilaasortat pisortarisaasalu Namminersorlutik Oqartussat illuutaanni 15ini najugaqartut qaffaaffigineqarnerpaajullutik ineqarnermut akiliutaat 50%-mik qaffaaffigineqassapput.
Se her, hvordan huslejestigningerne fordeler sig i forskellige boligkategorier.