Toqutsisoq ajortumik pineqartoq
Kristian Heilmann, arnamik perorsaasumik najugaqarfimmi Blåkægårdimi Viborgip eqqaaniittumi toqutsisup sullinneqarneranik misissuinermi paasineqarpoq isornartoqarsimaqisoq
Kristian Heilmannimut - angut kalaallinik qingoqqisup februaarimi perorsaasumik 46-nik ukiulimmik Judy Meiniche Simonsen savimmik arlaleriarlugu kapoorlugu Viborgimi Hald Søp eqqaani toqutsisumik suliniutaasimasut naammaginarsimanngilluinnarpoq.
Ataatsimiititaliaq Region Midtjyllandip toqutsinerup kingorna aallartitaa, siornatigut sumiiffimmi suleriaatsip misissorneqarneranut tapiliutitut misissuinermik ingerlatseqqipput.
Isornartorsiut imaannaanngitsoq
Region Midtjyllandip pisortaanera Anne Jastrup naapertorlugu nalunaarusiaq "sakkortuumik isornartorsiuivoq", 39-inik ukiulimmik Kristian Heilmannimik tarnikkut nappaatillit atornerluisullu katsorsarneqartarfianniittumik sullissisimaneq pillugu.
- Kisianni uagut nammineq misissuisoqarnissaannik inniminniisimavugut, pisoq alianaqisoq pillugu uagut nammineq ilikkagaqarusukkatta, Viborgimi tusagassiivinnik katersortitsinermi nalunaarusiamik saqqummiussisoqarnerani oqarpoq.
Ilaatigut katsorsaanissamik akisussaaffik naammaginanngitsumik ingerlanneqarsimavoq. Erseqqinngilaq qanoq aaqqissuunneqarsimanera aamma Sundhedsstyrelsip tarnikkut napparsimasut pillarneqarsimasut soorlu Kristian Heilmannitut ittunut sullinneqarnissaannik innersuussut naammaginartumik malinneqarsimanngilaq.
2009-10-mit 2012-ip aallartinnerata tungaanut nakorsat amigaataaqaat. Tamatuma kinguneraa nakorsat siunnersortit atorneqarmata tarnikkut peqqissaaveqarfinnut aalajangersimasumik attuumassuteqanngitsut, nakorsaanerlu katsorsaanermik akisussaasoq sapaatip akunneranut ulloq ataaseq taamaallaat psykiatrimiittarpoq.
Kukkunivinnik tikkuagassaqanngilaq
Nalunaarusiamili aalajangiunneqarpoq katsorsaanermi kukkunivinnik iliuuserineqanngitsoortunillu tikkuagassaqanngitsoq, toqutsinermut tunngaviusinnaasunik. Anne Jastrup naapertorlugu atorfillit pisoq pillugu akisussaatinneqarsinnaanngillat.
Judy Meiniche Simonsen savimmik 18-eriarlugu kapoorneqarluni aamma pinngitsaaleriarneqarluni Kristian Heilmannimit toqunneqarpoq orpippassuarni angalaaqatigiinnermi.
Toqutsinini nassuerutigaa sulili eqqartuussineq naammassinngilaq. Eqqarsartaatsikkut misissuinerup paasinarsisippaa niaqulaartuusoq. Naliliineq taanna Retslægerådimut nassiuteqqinneqarpoq, taakkua pillaatissaq naapertuuttoq aalajangiiffigissavaat.