Uuliamik ujaasineq: Ilisimasallit tusarliussaq tupaatigaat

Danmarkimi uuliamik ilisimasaqarnerpaat ilaat tupaallaqaaq Toral S.A. tupaallannartumik kajumissaarimmat Issittumi uuliamik ujaasinerup unitsinneqarnissaanik

Assi toqqorsivimmit: Steve Lindringe, Eye Ubiquitous

Nunarsuarmi nukissiornermik ingerlatsisut Issittumi uuliasiorlutik qillerinissamik pilersaarutitik unitsittariaqarpaat, avatangiisinik innarleerujussuarsinnaanerup annilaannganartortaqarnera pissutigalugu. Pingasunngornermi taamak tupaallannartumik nalunaaruteqarpoq nunarsuarmi uuliasiorfiit annersaasa ilaat, franskit Total S.A.,

Taamaalilluni nunarsuarmi uuliamik ingerlatsiviit annersaasa ilaat siullermeerluni issittumi qillerinissat aningaasartaqaqisut mianersorfigeqquneqarput.

- Christophe de Margerie (Total S.A.-mi pisortaanerusoq, aaqq.) tusarliussaa maluginiagassaavoq. Suliffeqarfissuup Totalitut angitigisup taamak erseqqitsigisumik nalunaaruteqarnera, uuliamik ingerlatsiviit allat Issittumi ingerlatsinissaminnut soqutiginninnerannik annikillisaaqataasinnaavoq. Uuliasiorfinnut allanut siunissami Kalaallit Nunaanni soqutiginnissinnaasunut taamak nalunaaruteqarneq qanoq sunniuteqarsinnaanersoq aatsaat takussavarput, Kalaallit Nunaanni Aatsitassanut Pisortaqarfiup ukiakkut 2013 Tunumi misissueqqaarnissanut akuersissutinik tunniussilerpat.

Taamak Berlingskemut oqarpoq Danmarkimi uulia pillugu ilisimasaqarnerpaat ilaat geolog Flemming G. Christiansen.

Taanna De Nationale Geologiske Undersøgelser for Danmark og Grønland, Geus, pisortap tulleraa Kalaallit Nunaanni aatsitassaqarfiit sumiinnerinik nalunaarsuinermik akisussaavoq kiisalu Kalaallit Nunaata Qalasersuullu akornanni nunap naqqata sumiiffissiniarlugu misissuinerit akisussaaffigai.

Powered by Labrador CMS