Aatsitassarsioqatigiiffik sakkortuumik isorineqartoq
Kalaallit inuiattut illuinnaasiortuunerannik avammullu isiginiannginnerannik nipeqartumik NunaMinerals saqqummiussaqartoq avatangiisinik illersuiniaqatigiiffik Avataq isumaqarpoq
- Quisaarpaluttumik isumaqartinneqarsimassagaluarpoq, kisianni taamaakkaluartoq tulluarpallaanngilaq, pingaartumik suliffeqarfimmut innuttaasunit piginneqataaffigineqartumut siuttuusup oqaaserimmagit.
NunaMineralsip pisortaa Ole Christiansen sermersuup nungulluni aannissaanik takorusunnerugaluarnerminik qanittukkut Amerikamiut aviisiannut new York Timesimut oqaasiinut avatangiisinut illersuiniaqatigiiffik Avataq taama qisuariarpoq. Taamaalillunimigooq aatsitassaqarneranik misissueqqissaarinissamut periarfissaqarnerulissagaluarmat.
Læs "- For min skyld kan isen bare smelte"
Ole Christiansenip oqaasiisa nunarsuarmi aviisit annerpaartaasa ilaanni ilanngunneqarnerat aamma pissusissamisuunngilaq, Avatap siulittaasua Mikkel Myrup isumaqarpoq.
Pitsaanngitsoq
- Tamanna ajoraluartumik inuiaat illuinnaasiortuusut avammullu isiginianngitsuunerannik nipeqalersitsivoq, Sermitsiaq.AG-mut oqarpoq.
- Sermersuaq tamakkerluni aakkaluarpat nunarsuaq tamakkerlugu ajornartorsiuteqalissagunaraluarpugut Kalaallit Nunaanni sermeqarfiusimasumi aatsitassarsiorfimmik ammaanermi iluanaarutissanik tamanik taalliisunik.
Ajoraluartumillu taamatut isiginnittaaseqarnermi Ole Christiansen aamma NunaMinerals kisimiinngillat, Mikkel Myrup isumaqarpoq. Ukiunimi kingulliunerusuni aatsitassaqarneranik uuliaqarneranillu misissueqqissaarneq pillugu oqallinneq tikinneqaraangat qitiusumik allaffeqarfiup uungaannaq isigisumik eqqarsartaaseqarneratut taasani misigiuartarsimavaa.