Piniartut taarsiivigineqarnissamik piumasaqartut
Isukasiani saviminissarsiorfik piviusunngortinneqarpat Nuummi aalisartut piniartullu eqqugaassapput taamaattumillu taarsiivigineqassallutik, NAPP isumaqarpoq
London Miningip Nuup Kangerluani saviminissarsiorfissatut pilersaarutigisaa Kalaallit Nunaata nalinginnaasumik aningaasarsiutigillualerniartussaagaa Nuummi piniartut eqqugaanissartik ernummatigaat. Aatsitassarsiorfiummi piniariartarfiit pingaaruteqarluartut sunniivigisussaavai.
Taamaattumik aalisartut piniartullu peqatigiiffiat NAPP Nuuk TV naapertorlugu siunnersuuteqarpoq, naalakkersuisut taarsiiviginninnissamut aningaasaateqarfiliussasut aatsitassarsiorfik pilersinneqassagaluarpat tamatuma kingorna Nuummi aalisartut piniartullu annaasarisassaannut matussusiisussamik.
- Sumiiffik piniartunit atorneqarsinnaanngippat piniartut isertitamikkut eqqugaassapput inuuniarnermilu atugarisaat kalluarneqassallutik, NAPP-p siulittaasua Lars Mathæussen Nuuk TV-mut oqarpoq.
Qanittukkut Nuummi London Mining innuttaasunik ataatsimiititsimmat taarsiiviginninnissamut aningaasaateqarfiliornissamik siunnersuut piniartunit saqqummiunneqarpoq, tamatumanili piniartut siunnersuutertik pillugu naalakkersuisunit oqaaseqarfigineqaratik. Tassami siunnersuut saqqummiunneqarmat aatsitassanut naalakkersuisoq Ove Karl Berthelsen, IA, Nuuk TV naapertorlugu angerlareersimavoq.