Aatsitassarsiornerit annertuut pillugit ilisimasatit misilikkit

Sapaatip akunnerani uani Sermitsiaq aqqutigalugu Ipad imaluunniit akissarsiassat pitsaasut arlaannik eqquisinnaavugit

Naalakkersuisut siulittaasuat Kuupik Kleist aamma inuussutissarsiornermut aatsitassanullu naalakkersuisoq Ove Karl Berthelsen Cairnip qilleriviani takornariartut. Assi toqqorsivimmit: Jørgen T. Hammeken-Holm

Oqallinnerit amersuut peqataaffigereerlugit, nalunaarusiat atuareerlugit, innuttaasunik ataatsimiittitsinerni peqataasareerluni, pisortat suliassanik isumaginninniartarnerat takusareerlugit, isummat assigiinngitsut tusareerlugit, pissangananngitsuunngilaq takuniassallugu, apeqqutit assigiinngitsut pillugit sutigut isumaqatigiissinnaanersugut.

Piffissami matumanerpiaq Inatsisartunut ilaasortat katersuussimapput, tamatumanilu pissangananngitsuunngilaq paasissallugu, qinikkat nammineerlutik qanoq isumaqarnersut paasiniaavigissallugit.

Ilisimasatit tunngavigalugit apeqqutit ataanniittut arfineq-pingasut akisinnaanerlugit misiliguk, tamatumalu kingorna maluginiarlugu inuit qanigisarinerpaasatit, ilisarisimasatit, ilaquttatit, ikinngutitit, politikkikkut suliaqartut, suleqatigisatit, pisortarisatit, soqutigisaqaqatigiiffiit sammisaqartitsisullu ilisimariigaat paaseqatigiissutigisartagaallu qanoq isumaqarfigineritit.

Sermitsiami maannakkut pisiarineqarsinnaasumi apeqqutit 16-iupput akisassatit aviisimi unammisitsinermi peqataarusukkuit. Kikkulluunniit akissutinik nassiussisut iPadimik eqqugassanillu allanik pitsassuarnik unammisitsinermi peqataasinnaapput. Ilaatigut Sermitsiamik aamma AG-mik pisartagaqarnissaq, taava Kalaallit Nunaata siunissaa pillugu oqalliseqataasinnaassaatit, aamma inuiaqatigiit qanoq ittut maannakkut siunissamilu inuuffigerusunnerlugit aalajangeeqataallutit.

Taamaattumik aatsitassanut naalakkersuisoq Ove Karl Berthelsen qinnuigissavarput akissutit eqqortuunersut kukkunersioqqullugit.

Soorunalimi apeqqutigineqarsinnaasut amerlanerusinnaassagaluarput, taamaattorli apeqqutit 16-t qulaani taaneqartut akissutissarsisinnaassagutsigit, tamatta paasisinnaassatsinnik aalajangeeqataasinnaanissarput ajornannginnerulissagaluarpoq, minnerunngitsumik innuttaasut isaannit isigalugu siunissami nunatsinni suliniutiginiakkat kingunerisinnaasaalu pillugit isummersornissaq ajornannginnerulissagaluarluni.

Apeqqutit siulliit arfineq-pingasut saqqummiuppagut. Apeqqutit sinneri arfineq-pingasut sapaatip akunnerani Sermitsiami saqqummersumi takusinnaavatit, ilaatigut naqqani innersuussivik aqqutigalugu pisiarisineqarsinnaasoq.

Apeqqutit:

1. Naalakkersuisut aalajangiiffigisarnerpaat aatsitassarsiorfiit suut nunatsinni ammarneqassanersut?

2. Aatsitassanut pisortaqarfiup avatangiisit pillugit aatsitassarsiortunut akuersisartuuppat?

3. Sulisussat avataaneersut SIK-p isumaqatigiissutaani appasinnerpaaffiannik akissaasersorneqartussaatitaappat?

4. Sulisussat avataaneersut aatsitassarsiorfissani inuinnanit allanit tikinneqarsinnaatinnagit najugaqartinneqartussaatitaassanerpat?

5. Nunatsinni peqqinnissaqarfiup sulisussat nunanit allaneersut suliassaminnut ilanngullugit kiffartuussassarinerpaat?

6. Aatsitassarsiornermik ingerlatsisussat piumagunik illoqarfinni illunik pisiortorsinnaatitaanerpat?

7. Aatsitassarsiorfinni sulisut kommunalbestyrelsinut Inatsisartunullu ukiut marluk nunatsinneereerunik qinersisinnaatitaanerpat?

8. Ilumut suliffeqarfiit nunatsinneereersut aatsitassarsiorfinnut pilersuisuussallutik naamaginartumik kiffartuussisinnaanerpat?

Powered by Labrador CMS