Siumut isummiussat kalaallinik ajornartorsiortitsisarput
Qallunaat siumut isummiussaat peqqutaallutik kalaallit sanngiitsut suliffissarsinissaat ikinngutitaartornissaallu ajornarnerulersittarpaat, Aarhusimi Kalaallit Illuutaannik pisortaq oqarpoq
Ajoraluaqaaq aamma kalaallit Danmarkimi najugallit sanngiinnersaannik suli ataavartitsineruvoq, tamakkua imerajuttutut imaluunniit atornerluisutut siumut nalilerneqartarmata, Svend Kolte Aarhusimi Kalaallit Illuutaannik pisortaq oqaluttuarpoq.
Taamak qisuariaateqarpoq pissutigalugu, Kalaallit Nunaanni takornariarqarnermut siunnersuisoqatigiit Visit Greenland, Yougov atorlugu misissuinermik nutaamik ingerlatsinerannit ersersinneqarmat, qallunaat amerlasoorpassuit kalaallit pillugit isummiussaat ilisimasakinnermit aallaaveqartut aamma imerajuttuunermik, atornerluisuunermik inuttullu ajornartorsiuteqarnermik siumut isummiussanik imaqartut.
- Aallaqqaamulli nalilerneqarsimaguit, patsisissaqanngitsumik - taava inunnut allanut attaveqarsinnaanerit ajornarnerulersinneqassaaq aamma suliffissaqartitsinerup iluani suliffimmik tunineqarnissat ajornarnerulluni, Svend Kolte oqarpoq.
Pisortaq naapertorlugu ajornartorsiutit annerpaartaa aallaaveqarpoq kalaallit ersarinnerinik.
Kalaallit Illuutaata Jyllandip kitaani kalaallit 4.000-t akornanni inuit tusindit marlussuit missaanniittut atassuteqarfigai - amerlanerpaat ilinniartuupput ingerlalluartut aamma ilaqutariit, kisianni inuit atugarliortut aamma ikiorserneqartarput.
Illumi oqariaaseqarput imaattumik; Mølleparkimi imerajuttut 200-t nikorfappata kalaallit aalakoortut marluk qallunaanit maluginiarneqassapput.
Sanngitsuunut inuuneq ajornarnerulersarpoq
- Kalaallit Danmarkimiittut amerlanerparparujussui ingerlalluartuupput. Imaassinnaavoq tamakku nalilerneqartarnertik annermik maluginiarneq ajoraluarlugu, naak qatsunnarsinnaagaluartoq ullut tamaasa nannup neqaanik unnukkorsiuteqarneq ajornermik nassuiaajuartussaallutik.
- Kisianni inunnut sanngiinnernut inuunermik oqinnerulersitsineq ajorput. Imaanngilaq allanngortinneqarsinnaanngitsut kisianni inuunermik oqinnerulersitsineq ajorput, Svend Kolte oqarpoq.
Pisortap Kalaallit Nunaannik isiginnittaaseq ukiunik 70-inik pisoqaavallaarnerarpaa. Oqaluttuat nuanninngitsut ingerlapput tusagassiiviit atuarfiillu isummanik allanngortitsiniaasussaapput, Kolte isumaqarpoq.
- Kalaallit Nunaannik ilisimasanik assigiinngitsunik tunniussinissaq piffissartorfigineqanngilaq. Taamaaliornikkut siummut isummiussat ataavartinneqarput, tamannalu assut ajuusaarnarpoq, Svend Kolte oqarpoq.