Qallunaat: Kalaallit imertuupput qinnuuloortuullutillu

Kalaallit pillugit siumut isummiussat imaaginnaavipput. Pissutsilli piviusut tassaavoq qallunaat imernerummata aamma kalaallit Danmarkimi najugallit amerlanerpaat namminneq aningaasatigut ingerlammata

Kalaallit Nunaanni takornariaqarnemut siunnersuisoqatigiit - Visit Greenland - sinnerlugit misissuineq ingerlanneqarpoq, qallunaanik 1017-inik 18-it 74-illu akornanni ukiulinnik siummut isummiussat pillugit apersuineruvoq. Assi: Leiff Josefsen

Imerneq, atornerluineq aamma inuttut ajornartorsiutit.

Qallunaat 40 procentiisa qularutiginngilaat qanoq akissallutik aperineqaraangamik: "Kalaallit nalinginnaasumik qanoq isumaqarfigaagit?"

Kalaallit imertuupput, meeqqaminnik sumiginnaasut, nunaqarfinni mikisuni najugaqarlutik, qaannanik angallateqarput puisaaqqanillu piniartarlutik. Kalaallit Danmarkimiittut amerlanerpaartai pisortanit ikiorserneqarput imaluunniit suliffissaaleqinertik pissutigalugu pisartagaqarlutik, akissut taama nipeqakkajuppoq.

Visit Greenland misissuinermik ingerlatsisuuvoqMisissuineq Kalaallit Nunaanni takornariartitsinermut siunnersuisoqatigiit, Visit Greenland, sinnerlugit ingerlanneqarmat qallunaat 1017-it, 18 aamma 74 akornanni ukiullit siumut isummiussaat pillugit aperineqarput.

- Siummut isummiussagut misilittakkanik aallaaveqarput. Ilitsersuunneqarsimaguit imaluunniit takusimagukkit kalaallit inuuniarnikkut ajornartorsiuteqartuusut, taava isummiussat ingerlateqqittarpat, sociologimi ph.d.-mik ilinniartoq Aya Mortag Freund, oqarpoq, taassuma kalaallit nalinginnaasut ilisimatusarfigai. Misissuinermi ilaatigut erseqqissarneqarpoq inuit affaasa missaat isumaqartut kalaallit qallunaanit amerlanernik immiaaqqanik ammaasartut.

- Nunasiaateqartuusutut kalaallit kikkuuneri oqaluttuassartaallu allaaserinikuuagut. Pinngortitami inuusutut nujuartutut eqqartoqqaarpagut - kingorna inuit imminnut paarisinnaanngitsutut isikkoqartikkiartorpagut, Aya Mortag Freund oqarpoq.

Siumut isummiussat aamma pissutsit piviusut
Kisianni siummut isummiussat pinngitsooratik pissutinit piviusunit aallaaveqanngillat. Apriilimi misissuinerup erseqqissisippaa, kalaallit imigassamik aalakoornartumik atuinerat uikiuni kingullerni appariaateqarsimasoq. Ilami qallunaat 14-it sinnerlugit ukiullit agguaqatigiissillugu immiaaqqat kalaallit imertagaannit 86-inik amerlanerit imertarpaat.

- Qaquguluunniit akornatsinniittoqassaaq inuttut pissuserissaarutit nalinginnaasut aamma inuiaqatigiit piumasaqaataannik nalinginnaasunik naammassinnissinnaanngitsunik, tamanna aamma qallunaanut, svenskinut, tyskinullu atuuppoq, Aya Mortag Freund naqqissusiivoq:

- Arlaatigut ilumoortortaqarput, kisianni tamanna ikittuinnarnut attuumassuteqarpoq. Inuit ilaat suli atornerluisuupput imaluunniit inuttut inuunerminni innarliasumik inissisimallutik - ajoraluartumillu ersarissisarput naliliinernut tunngaviulertarlutik kalaallit tamarmik taamannak inuusutut nalilersorneqartalerlutik.

Alla siummut isummiussat saqqumilaarnersarigunagaat aamma eqqunngilaq: qallunaat 43 procentii isumaqarput kalaallit Danmarkimi najugaqartut affaanit amerlanerit pisortanit pilersorneqartut. Kisitsisit piviusut tassaapput 16 procent.

Julie Berthelsen aamma Sara Olsvig
Erinarsortartup Julie Berthelsenip kalaallit pillugit siumut isummiussanik malussarnerpaanut ilaagunarpoq.

- Danmarkimut ilinniariartorlunga tikikkama oqartarput: Immiaaqqamik ataatsimik ilallugu tunissavat. Ajunngitsumik isumaqarlutik quujasaaralutillu - kisianni Kalaallit Nunaanneersuulluni oqaraanni taava "kalaallisulli aalakoortiginermik" taaguusersuisarneq atorneqalertarpoq, Julie Berthelsen oqarpoq.

Aamma Inuit Ataqatigiit sinnerlugit folketingimut ilaasortaq Sara Olsvig siummut isummiussanik malussarniartarpoq. Ilaatigut amerlaqisut paatsuunganaraat sooq kalaallisuulersornersoq Danmarkimi ilinniarnertuunngorami.

Taanna aamma Julie Berthelsen isumaqarput, isiginnittaatsip equnganerujussua annerusumik ilisimatitsinermit allanngortinneqarsinnaasoq.

- Qallunaat akisussaaffigaat namminneq innuttamik pitsaanerusumik ilisimatinneqarnissaat. Tamanna meeqqat atuarfii aamma ilinniarnertuunngorniarfiit isumagisariaqarpaat, ukiumut ilinniagassatut aalajangiussat naleqqussarnerisigut, taakkuami qallunaat innuttaasut nalinginnaasumik ilisimasassaannik aallaaviliisussaammata, Sara Olsvig oqarpoq.

Kalaallit Nunaat pillugu oqaaseqartartoq: Peqqusiileqinarpoq
Socialdemokratit sinnerlugit Kalaallit Nunaat pillugu oqaaseqartartoq, Flemming Møller Mortensen, oqarpoq, taamak ilisimasakitsigineq peqqusiileqinartoq.

- Taamaattariaqanngilaq taamaattumik qallunaat aamma kalaallit politikkeriisa akisussaaffeqarnertik ersersittariaqarpaat, Kalaallit Nunaannik ilisimasat allanngortinneqartariaqarput, Flemming Møller Mortensen oqarpoq.

Powered by Labrador CMS