Nunat inoqqaavi Nunarsuarmiut kingornuttagassaasa allattorsimaffianni ilaginnarneqartut
Nunat tamalaat piorsarsimassutsikkut kingornutagaat pillugu Danmarkimi ataatsimeersuartoqarnerani nunat inoqqaavisa siunnersuuteqarsinnaanerannik pisariaqartitsineq eqqaaneqarpoq, nunarsuarmiut kingornuttagassaasa toqqarneqarnissaannut atatillugu
Sumiiffinnit arlaqaqisunit Unescop pinngortitamik immikkuullarilluinnartumik imaluunniit piorsarsimassutsikkut kingornuttakkamik allattugaataanut ilanngukkusukkaluarput - allattorsimaffik aamma taaneqartartoq Nunarsuarmiut kingornuttagassaasa allattorsimaffiat ukiuni 40-ni atuuttoq.
Nunatsinni manna tikillugu Nunarsuarmiut kingornuttagaasa allattorsimaffianni ataatsimik allassimasuuteqarpugut, tassa Ilulissat Kangerluat, assersuutigaluguli Danmarkimi Kronborg, Roskilde Domkirke aamma Jellingimi ujaqqat allattorsimaffimmi tassani allassimapput.
Nunarsuarli tamaat isigalugu assersuutissarpassuaqarpoq nunat inoqqaavisa naalakkersuisunik akimmisaartinneqarlutik takorannersuutiminnik Nunarsuarmiut kingornuttagassaannut ilanngutsiterusukkaluarlutik ajornartorsiuteqarnerannut, Kristeligt Dagblad allappoq.
- Nunarsuarmiut kingornuttagaannik isumaqatigiissut 1972-imeersoq naapertorlugu, pinngortitaq imaluunniit inuiassuarnut kulturikkut naleqartitat pineqarsimapput, inuit tamakkunani najugaqartut eqqarsaatigeqqaarnagit, Lola Garcia-Alex oqarpoq, taanna naalagaaffiit suliffeqarfiutiginngisaanni IWGIA-mi ( International Work Group for Indigenous Affairs) pisortatut atorfeqarpoq, nunani inunngortunik nunallu inoqqaavisa illersorneqarnissaannik suliaqarlutik.
- Nunat inoqqaavi politikkikkut sunniuteqarsinnaanngitsutut isigineqarsimapput, nunarsuarmiut kingornuttagassaannik toqqaanerni siunnersortitut atorneqarsimanngitsut, Lola Garcia-Alex, Kristeligt Dagbladimut oqarpoq oqaatigalugulu saamit Skandinaviap Avannaani najugallit tassaasut nunap inoqqaavi suliniutini arriitsumik ingerlanneqartartuni maluginiarneqarsimanngitsut nunarsuarmiut kingornuttagassaannik toqqaanerni.
Ulluni makkunani Lola Garcia-Alex Københavnimi piorsarsimassutsikkut kingornuttakkat pillugit ataatsimeersuarnermi peqataavoq, tassani nunat inoqqaavisa nunarsuarmiut kingornuttagaannik toqqaaniarnermi ajornartorsiutaat eqqartorneqarput.