Tuluit Nunaat: Kalaallit Nunaanni uuliasiorneq unitsinneqarli
Silap pissusaatigut ajunaarnersuaq pinngitsuussagutsigut Issittumi uuliasiorneq tamarmi piaarnerpaamik unitsinneqartariaqarpoq, Tuluit Nunaata inatsisartuini politikerit mianersoqqusipput
Cairnip Kalaallit Nunaanni uuliamik nassaarniarnera unitsinneqartariaqarpoq. Taamatuttaaq Shellip Ruslandip Issittortaani uuliasiornera unitsinneqartariaqarpoq.
Taama nalunaarusiami Tuluit Nunaanni politikerinit 16-init suliarineqarsimasumi sisamanngornerlu sioqqullugu unnuakkut tamanut saqqummiunneqartumi oqariartuut nipeqarpoq. Politikerit Tuluit Nunaanni inatsisartut allequtaanni avatangiisinut ataatsimiititaliamut ilaasortaapput.
Kalaallit Nunaanni issittullu sinnerani uuliaqarneranik misissuinernut tuluit politikerit akerliunerat silap pissusaata allanngoriartorneranik tunngaveqartinneqarpoq.
Ikummatissanik soorlu uuliamik atuineq silap pissusaata allanngoriartorneranut ajorseriartitsisarpoq. Taamaattumik nukissiuutit ataavartut atorneqarnerat siuarsartariaqarpoq uuliamillu atuineq annikillisinneqartariaqarluni, tuluit politikerit oqarput.
Tamatuma saniatigut isumaqarput Issittumi uuliasiornermi periaatsit ima qaffasitsiginngitsut uuliaarluertoqarpat saliinissamik naammassinninnissinnaanatik.
Nunarsuarmi uuliamik atuinerup ullormiit ullormut unitsinneqarnaviannginnera avatangiisinut ataatsimiititaliamit ilisimaneqarpoq. Issittumili uulia nassaarineqarlunilu qallorneqassappat politikerinit 16-init taakkunannga inassutigineqarpoq piumasaqaatit arlallit piumasaqaatigineqarnissaannut Cairnip Shellillu Kalaallit Nunaanni Ruslandimilu ingerlataat unitsikkallarneqartariaqaraluartut.
Piumasaqaatit ilaatigut tassaapput:
- issittoq tamakkerlugu uuliaarluernermut ataatsimoorussamik periaasissaq eqqunneqassaaq.
- uuliasiornermut gassisiornermullu suleqatigiissitamik pilersitsisoqassaaq uuliasioqatigiiffiit qillereriaasiinik, uuliaarluernissamut upalungaarsimanissamullu pilersaarutaannik nalilersuisartussamik.
- Issittumi uuliaarluertoqarsinnaaneranut upalungaarsimanermut atatillugu atortorissaarutinik atorneqartunik misissuisoqarlunilu misileraasoqassaaq. Atortorissaarutillu tamakkua arlaannaannulluunniit attuumassuteqanngitsunit nalilersorneqareerpata Issittumilu sumiiffinni allanisulli patajaatsigisumik atorneqarsinnaanerat paasinarsippat uuliasioqatigiiffiit misissueqqissaarinermi qillerinissamut aatsaat akuerineqartariaqarput.
Tuluit Nunaannit nalunaarusiaq suliarineqarpoq naliliinerit 30-t oqaasiinnakkullu tusarfinnik apersuinerit tunngavigallugit. Ilaatigut suliniaqatigiiffinnut WWF-imut Greenpeacemullu, uuliasioqatigiiffinnut Shellimut Cairnimullu, Issittumi Siunnersuisoqatigiinni suleqatigiissitamut, Norgep Sverigellu aallartitaannut kiisalu Tuluit Nunaanni silasiornermi kiffartuussivimmut.