MIBB-ip suliniutaa nutaaq ilassilluarneqartoq

Meeqqat Inuunerissut suliniutaat "Kuseriarnerup siaruarneratut" ingerlakkumallugu suliniummi suleqataasut Paarnannguaq Andersen aamma aqutsisoq Nivé Heilmann Nuummeersut sapaatip-akunnerini kingullerni pingasuni Aasianniipput.

Suliniummi siunertarineqartoq tassaavoq nammineq kajumissutsiminnik suleqataasartunik attaveqarfissanik pilersitsinissaq, assersuutigalugu inersimasut tamarmik akisussaaffiannit ataatsimoorussillutik kivitsisinnaasunik, soorlu illoqarfinni qulinni ukiut pingasut ingerlaneranni tikinneqartussani meeqqat atugarissaannginnerat inersimasunit paasineqaraangat imaluunniit kinguaassiuutitigut atornerlunneqarsimanerat pasitsaanneqarsimagaangat.

Suliniut Kuseriarnerup siaruarneratut Meeqqat Inuunerissut meeqqanik atornerluisarnermut akerliussutsimik takutitsinerup kingorna Nuummi januaarimi 2008-mi pilersinneqartup suliaraa.

Illoqarfik siulleq, Aasiaat, tikeraareerlugu Paarnannguaq Andersen aamma Nivé Heilmann naammagisimaarinnittorujussuupput.

- Inuit soqutiginnittorujussuupput, aamma containerini pingasut allaffittut pikkorissartarfittullu atorneqartuni pulaarneqartarsimavugut, Sermitsiaq.AG-mut oqaluttuarput.