Tele-Post naapertuilluanngitsumik unammillertoqarnissaanik ernummatiginnittoq

Nuummi internettimi namminersortunngorsaasoqarnissaanik Nalunaarasuartaateqarnermi Aqutsisut aalajangiineranni ataaseq Tele-Postip pisortaata ernummatigaa

Aningaasartuutiviit atugassarititaasullu isiginiarneqanngippata sinerissami ineriartortitsinerup eqqugaanissaa Tele-Postimi pisortaaanerugallartup Steen Montgomery-Andersenip ernummatigaa. Assiliisoq: Leiff Josefsen

Tassalu Nalunaarasuartaateqarnermi aqutsisut aalajangiinerminnut atatillugu unammilleqatigiinnerup ”naapertuilluartumik naligiissumillu” ingerlanneqarnissaanik piumasaqaataat atuussinnaassanersoq:

- Taamaattoqanngippat Kalaallit Nunaat sukkasuumik eqqornerlugaasinnaavoq, tassami Kalaallit Nunaanni illoqarfiit nunaqarfillu attaveqaatitigut ataatsimuulersinneqartarnerannut aningaasaliissutaasartut annertuut pingaaruteqaqisullu navianartorsiortinneqalersinnaammata.

- Nalunaarasuartaatitigut aqutsisisut akinik aalajangiinissaat nammineerluta qinnutigisimagatsigu, aalajangiinerat soorunami maannamuugallartoq tusaatissatut tiguarput. Kisianni taama oqareeraluarluta, kingoqqutsereersimanngikkutta sakkortuumik kaammattuutigissavarput akinut atatillugu naatsorsuutitik Kalaallit Nunaanni aningaasartuutiviusut aallavigalugit nalimmassaqqullugit. Tassami aalajangiinnermi aningaasartuutit piviusut aallaavigineqarsimanngillat, Steen Montgomery-Andersen oqarpoq.

Læs også "Tele-Post klar med lavere internetpriser"

Læs også "Internetmarkedet i Nuuk er frigivet"

Aalajangiinermi isiginiarneqanngitsut


Tassani innersuussutigaa, aalajangiiniarnermi kingumut qiviarluni suliffeqarfiup aningaasartuutigisimasarpassui isiginiarneqarsimanngimmata. TELE-POST-immi ilaatigut imaatigut kabelip, mobilimut attaveqaatit ineriartortinneri, sinerissamilu sakkortusaaviit annertuumik aningaasaliiffigalugillu aqqutissiuussimavai.

- Aammalu suliffeqarfiup ingerlaavartumik attaveqaatitigut aaqqissuussinermi pilersitsiortornerit aserfallatsaaliinnerillu Kalaallit Nunaannik ataatsimuulersitsisut isumagisarsimallugit. Aammattaaq TELE-POST-ip aqutsisut siunissami atuinissamut naatsorsuutigisaat apeqquserpai.

Sineriammiittut ernumagigaat
Aningaasartuutiviit atugassarititaasullu piviusut isiginiarneqanngippata, pisortaanerup sinerissami ineriartortitsinermi atugassat aarleqqutigai:

- Illoqarfinni tamani suliffeqarfeqarpugut, nunalu tamaat sullillugu. Aalajangiinerulli kingunerisaanik illoqarfiit annerusut avataanni ineriartortitsinermut aningaasaliisinnaanerput killeqalissappat, tamanna paasinninnerput malillugu ajornartorsiutinik assigiinngisitsinernillu nassataqalersinnaavoq, uanga nassuiaruminaatsitannik illersoruminaatsitannillu.

Taamaammat aamma tamanna pissutigalugu TELE-POST-imiit pisinnaasarput tamaat imaatigut kabeleqartut Nuup/Qaqortullu akornanni, sinerissamilu akit sapinngisamik assigiinngippallaannginnissaat sulissutigissavarput, Tele-Postip pisortaa tusagassiuutitigut nalunaarummi allappoq.

Tamannali ilutigalugu Steen Montgomery-Andersen-ip naqissuserpaa, eqaatsumik unammileqatigiittoqassappat, pisortat unammilleqatigiinnerup ingerlanissaanik illersuillutik patajaatsumik sullissisariaqartut, TELE-POST-ilu niuernerup iluani unammilleqatini assigalugit pisortaqarfinnut akuersisitseqaarani akinik nioqqutinillu allannguisinnaanissamik pisinnaatitaasariaqartoq.

Massakkumi assersuutigalugu TELE-POST-ip ukioq manna marts-imi junimilu akinik appaaniarluni akuereqqullugit qinnuteqaatai Nalunaarasuartaateqarnermi aqutsisoqarfimmi suli uninngatinneqarmata.

Sermitsiaq.AG Nuuk Skynetimit oqaaseqartitsiniarpoq.

Powered by Labrador CMS