2016-imi AWG-mi Nuummi timersuutit 15-it

Taama Arctic Winter Games International Committee aalajangerpoq. Timersuutit arlallit Nuummi perngaammik takussavavut

2016-imi Nuummi AWG-mi paaneq imaluunniit Wrestling unammissutigineqassaaq. Asseq ukioq manna Whitehorsemi AWG-meersuuvoq. Assiliisoq: John Jakobsen

2016-imi Nuummi Arctic Winter Gameseqarnissaanut tunngasut erseqqissiartulaalerput. 2916-imi timersuutit sorliit unammiuaarutigineqarnissaannik Arctic Winter Gamesimi Internationale Committee AWGIC aalajangeqqamerpoq.

- Timersuutit unammiuaarutigineqartussat 15-iussapput, unammiuaarnerillu ingerlanneqarnerannut Kommuneqarfik Sermersooq akisussaasuussaaq. 2016-imoi AWG timersuutinik 15-inik imaqassaaq. Sikumi arsaaraarneq ilanngullugu, taannali Nunavumi Iqalunni ingerlanneqassaaq, AWGIC-ip siulittaasua Gerry Thick oqarpoq.

- Nunat ilaasortalluunniit tamatigut peqataasartut ukiut aqqaneq-marlunngornerit tamaasa aaqqissuisuusarnissaannik AWG aaqqissuunneqarsimavoq. Tamatuma peqatigisaanik timersuutinik tamanik ingerlatsisoqarnissaa atuuttarpoq, Kalaallit Nunaannili sikumi unammisarfeqannginnera pissutaalluni AWGIC aalajangerpoq curling, speed-skating aamma kunstskøjteløb AWG-mut ilaatinneqassanngitsut.

Internationale Committeemilli oqaatigineqarpoq timersuutit taakkua 2018-imi unammiuaarutigineqaqqissasut.

Timersuutit 15-it
2016-imi Nuummi AWG-mut atatillugu timersuutinik nutaanik takusassaqassaagut. Taakkua tassaapput basketball, sisoraaserluni ooqattaasarneq, aputisiuserluni ooqattaasarneq, eqqillit pinnguaataat, aputisiuserluni oqilaniunneq aamma paaneq.

Timersuutit unammiuaarutigineqartussat 15-it ukuupput: Sikumi arsaararneq Iqalunni ingerlanneqartussaammat 14-iinnaapput. Sangusaarissat, Arctic Sport (Inuit Games), sulorarneq, basketball, sisoraaserluni ooqattaasarneq, aputisiuserluni ooqattaasarneq, sisoraatinik ujakkaarneq, piorsarsimassuseq, eqqillit pinnguaataat, illup iluani arsaanneq, aputisiuserluni oqilaniunneq, nerrivimmi arsaararneq paanerlu (wrestling).

Arctic Winter Games 2014-imi Alaskami Fairbanksimi ingerlanneqassaaq.

Powered by Labrador CMS