SIK-mit immikkut inatsisiliorneraaneq avaqqutaarinninnerlu ilumuunnginnerarai

SIK-p siulittaasuata Jess G. Berthelsenip Naalakkersuisup tarrup ataani Qallunaat Nunaanni naalakkersuisut peqatigalugit sulianik angisoorsuarnik suliniutinut atatillugu nunanit allanit sulisartut atorneqarnissaat pillugit pisortaqarfittut aqqutissat tamaasa avaqqussorlugit immikkut ittumik inatsisiliornialersaarnerarpai.

Inuussutissarsiornermut Aatsitassarsiornermullu Naalakkersuisup Ove Karl Berthelsenip Jess G. Berthelsenip oqaaseqaatigisai sakkortuumik eqqortuunnginnerarpai.

- Imassartaqanngillat. Inatsisiliornerit tamarmik soorunami pisortatigut aqqutissatigoorput - tamanullu ammasumik tusarniaanissamut malittarisassiat atuuttut tamarmik atorlugit pillutik, Ove Karl Berthelsen erseqqissaavoq.

Læs også "SIK: Særlov strikkes sammen i ly af natten"

Inatsisissatut siunnersuut saqqummiunniaraat
Taanna oqaluttuarpoq, Inatsisartut ukiakkut ataatsimiinnissaanni Naalakkersuisut sulianik angisoorsuarnik suliniutini illuliorlunilu sanaartornernik suliat pillugit inatsisartut inatsisissaannut siunnersuut saqqummiunniaraat.

- Siunnersuut taanna ammasumik tusarniaassutaasimavoq. SIK aamma tusarniaanermut akissuteqarsimaovq. ”SIK-mit allarpassuarnillu tusarniaanermut akissutit maannakkorpiaq inatsisartut inatsisissaattut siunnersuummut ilanngussornerat suliaraarput, taamaattumillu arlaannik isertuussaasumik suliaqartoqarneranik oqaaseqarniarneq paasisinnaanngilluinnarpara, Ove Karl Berthelsen oqarpoq.

- Inatsisissatut siunnersuummut oqaaseqaatini Danmarkimi nunat allamiunut inatsisaasumut aammalu sulianik angisoorsuarnik suliniutini nunat allamiunut sulisuusnut suliffeqarnermik akuersissutissat pillugit folketingimi inatsisissamut nutaamut siunnersuummut imarissassanut tunngassuteqartut ammalluinnartumik nassuiarneqarput. Folketingimi inatsisissatut siunnersuut nalinginnaasumik najoqqutaqartarneq naapertorlugu Inatsisartunut sioqqutsisumik saqqummiussereernikkut upernaami folketingimi saqqummiunneqassaaq, tassalu Inatsisartut ukiami ataatsimiinnerminni sulianut angisoorsuarnut inatsisissaq akuerissappassuk.

Aningaasarsiat atorfininnermilu piumasaqaatit akuersaarnartut
- Sulianik angisoorsuarnik suliniutit tamakku angissusertik pissutigalugu nunanit allamiunik sulisartunik atuisoqartinnagu ingerlanneqarsinnaannginnerat paasinartuuvoq, Ove Karl Berthelsen tusagassiuutitigut nalunaarummi erseqqissaavoq.

- Taamaattumik folketingip inatsisissaanut siunnersuutip aamma sulianut angisoorsuarnut inatsisissap nunanit allanit sulisartunik atuinerup aningaasarsiatigut atorfininnermullu piumasaqaatinik iluartunik akuersaarnartunillu pisinnaanissaata isumannaarnissaa. Sulianik angisoorsuarnik suliniutit immikkut illuinnartunik inooqatigiinnikkut, kultureqarnikkut aningaasaaqarnikkullu unammillerfissaqartitsipput, sulianullu angisoorsuarnut inatsisiliorneq, nunatsinni Danmarkimilu sulianik angisoorsuarnik suliniutinik tamakkuninnga akisussaassuseqartumik isumaginnissinnaanissatsinnik isumannaarissapput.