Ikuallattoqarnerani angut toqukkut qimaguppoq
Tallimanngornermi unnukkut ikuallattoqarmat angut 46-nik ukiulik toquvoq
Ilulissani Politiit tallimanngornermi unnukkut qulit qeqqata missaani Atersuarni inissiat ilaata ikuallanneranik nalunaarfigineqarput.
Qamiterinerup ingerlanerata nalaani, politiit aammaarlutik nalunaarfigineqarput inissiaqarfimmi ungasinngitsumi allamik ikuallattoqartoq, inunnik qimagutsitsiniarnermi qamiterinermilu inummik toqungasumik naammattuuisoqartoq.
Taanna napparsimmavimmukaanneqarpoq napparsimmavimmullu apuunnermi toqusimasutut nalunaarutigineqarluni. Pineqarpoq angut Iluliarmiu 46-nik ukiulik, ikuallannermut atatillugu toqusimagunartoq, politiit ilisimatitsipput. Angutip ilaqutai kalerrinneqareerput.
Ikuallattumik misissueqqissaarneq ingerlanneqalereerpoq, Nuummit ikuallattoqartillugu teknikkikkut paasiniaasartunik ikiortissarsiortoqareerluni, Ilulissani politiit ilisimatitsipput.
Qaasuitsumi politiit kommunip ikiueqqaartussatut piareersimatitai aamma Ini ikiortigalugu najugaqartut katillutik aqqaneq-marluk inissinneqarallarnissaannik isumaginnipput, inigisaat ikuallattoqarnera pissutigalugu putsumit akornusersimammata.
Politiit ikuallattup sumit aallaaveqarnera misissorlugu aallartipput.