Tunumi takornariartitsisarneq aamma annilaanngatigaat
- Kusanaatsorujunngorsinnaavoq Islandimut aqqut qulakkeerneqarsimanngippat, Sermersuumi Inuussutissarsiornermut Siunnersuisooqatigiit eqeersaallutik nillissutigaat
Sermersuumi Inuussutissarsiornermut Siunnersuisooqatigiit siulittaasuata borgmester Asii Chemnitz Narupitulli kiffartuussinissamik isumaqatigiissut nutaaq iluarinngitsigaa.
- Air Iceland maannakkut avammut nalunaarpoq ukiukkut angallanneq Reykjavik Kulusullu akornanni unitsillugu siusinnerpaamillu aallarteqqissallutik martsimi ilimanarnerussallunili majimi. Piffissat taamak tigussaatiginngitsigisut tuniniarsinnaanngilagut.
Vest Norden Travel Mart aajunaarannguaq aaqqissuunneqalerpoq tassanilu ukiumut upernaamullu misigisassat tuniniarneqartarlutik – kisianni qanoq tuniniaasinnaavugut takornarissat qanoq tikissanersut aallassanersulluuniit nalullutigut?, Martin Ben Shalmi oqarpoq.
Martin Ben Shalmip Tunumi inuussutissarsiortut ataqqisorujussuuai ilaatigut tassaammata nunatsinni takornarissanik isumaginninnissamut ajunngilluinnartumik misigisaqartitsinissamut ineriartortitsisimasut. Nunami immikkoortaq Kalaallit Nunaanni amerlanerpaanik takornarissanik tikinneqartartoq minnerunngitsumillu nunami immikkoortaq takornariaqarnermut isertitat tunngaviginerullugit ineriartortoq ingerlanneqartorlu.
- Qanormita ilaqutariikkuutaanut amerlatigisunut sunniuteqassua isertitassaraluanut isertinngittuukkanut takornariaqarnermut tunngavissaq peerneqarpat?, siunnersuisooqatigiinnut siulittaasoq aperivoq.
Kusanaatsorujussuanngorsinnaavoq
- Kusanaatsorujunngorsinnaavoq Islandimut aqqut qulakkeerneqarsimanngippat. Taamaammat Sermersuumi Inuussutissarsiornermut Siunnersuisooqatigiinniit ilimagilluinnarparput Naalakkersuisoq akisussaasoq Jens B. Frederiksenip qulakkeersimassagaa Islandimiit kommunittalu kangianut aqqut ingerlaavartoq ingerlaannarnissaa, Shalmi isumalluarluni oqarpoq.
Sermersuumi Inuussutissarsiornermut Siunnersuisooqatigiit naggataatut eqqaarusuppaat siunnersuisooqatigiit naammaginarluanngilluinnartutut isigimmassuk, piffissaleerpiarani tunumiillu Islandimut aqqut tigussaasumik paarlatsissaqarnagu Tunumi inuussutissarsiornerput tunngavissaa taamatut piiginnarneqassappat.
- Sermersuumi Inuussutissarsiornermut Siunnersuisooqatigiit siunissami taamatut pisoqannginnerani takuutikkusuppoq taamatut iliuutsit eqqarsaatigilluanngisat pinngitsoorneqarnissaat annikillisarniarlugit, Martin Ben Shalmi erseqqissaavoq.