Nuummi aallaasersortoq imminut aallaavoq
Nuuk illoqarfiata immikkoortortaani Nuussuarmi sisamanngornermi unnukkut aallaasersortoq imminut aallaavoq. Nal. 22.30 angut suliarineqarpoq
Allaaserisaq nal. 21.00-miit nutarteqartarpoq - kingullermik nal. 22.53:
Allaaserisaq saqqummiunneqaqqaarami nal. 21.00 qulequtaraa: "Sisamanngornikkut unnukkut Nuummi aallaasersortoq", Ole Brandtip Aqqutaani Mannguanilu najugallit - Sermitsiaq.AG-ip paasissutisssaatai naapertorlugit - politiinit illunit aneqqusaajunnaartut aallaasersortoqarnera pissutigalugu. Taamaattumik allaaserisaq maannakkorpiaq mianersoqqussutitut aallartippoq. Pisut ingerlaqqipput allaaserisarlu ingerlaavartumik uani immikkoortortami pisut ineriartornerinik allaaserinniffiuvoq. Taamaattumik allaaserisaq pisut ineriartornera naapertorlugu allataavoq, paasinarnerulluni sisamanngornermi unnukkut pisut malinnaaffigalugit atuassagaanni.
Politiit sisamanngornermi unnukkut immikkut atisalersorsimallutik Nuup immikkoortortaanut Ole Brandtip Aqqutaanut imaluunniit Mannguanut ingerlaarput.
Sermitsiaq.AG'p aallaasersorfiup eqqaani najugalinnit paasissai naapertorlugit igeriarneq arlaleriarluni tusaaneqarsimavoq najugaqartullu annilaangatinneqaqaat politiinillu illup iluaniiginnarnissaannik piumaffigineqarlutik.
Angut, ataasiarluni arlaleriarluniluunniit igeriarsimasoq nal. 21'p missaani suli angerlarsimaffimminiippoq.
Politiit megafoni atorlugu oqalupput.
Ambulancemik takkuttoqarpoq. Ole Brandtip Aqqutaa assersorneqarpoq.
Susoqarnera nalileruminaappoq aallaasersorfiup eqqaa assersorsimalluni tikeqqusaajunnaarmat.
Politiit angut aallaasersortoq tunniutiinnaqqullugu piumaffigaat.
Allaaserisami assinik atorneqartunik assiliisimasoq oqarpoq igeriarnerit sisamat-tallimat tusaallugit.
Nal. 21.30: Politiit aallaasersortoqannginnerarpaat
Nuummi Politiit nal. 21.30 Sermitsiaq.AG-mut naatsumik mail'imik nassiussipput allallutik aallaasersortoqarneranik tusarliussisoqanngitsoq imaluunniit tusaasoqarsimanngitsoq.
Nal. 21.45 politiit - Sermitsiaq.AG.-p sumiiffimmi najugalinnit paasissutissaatai naapertorlugit - aallaasersortumut qanillattorput, inimut angutip isersimaffigisaanut iserlutik.
Angutip najugaqarfigisaata matuani politiit marluk nikorfapput.
21.55: Najugaqartut assortuussutigaat ilumut politiit ineqarfimmut isivissimanersut. Anorlernera siallerneralu pissutigalugu najugaqartut aallaasersortumik tusaasimanerlutik tusaasimannginnerlutilluunniit assortuunnerannut patsisaasinnaavoq.
Nal. 21.58: "Isilerput", allaaserisami assiliisoq allappoq.
Nal. 22.30: Angut imminut aallaavoq
- Angut imminut aallaavoq maannakkorpiarlu passunneqarluni. Allamik oqaasissaqanngilanga. Baarj.
Nipi taanna Nuummi Politiinit pigaartuusup Sermitsiaq.AG. unnummi pisut paasisassarsiorfigalugit saaffiginnimmat pissarsiaraa.
Angutip kinaanera paasineqanngilaq. Qanoq innersoq naluarput. Aamma sumerpiaq aallaasersortoqarnera paasinngilarput.
Aaqqissuisoqarfiup aammaarlugu nalunaarutigaa:
Allaaserisaq saqqummiunneqaqqaarami nal. 21.00 qulequtaraa: "Sisamanngornikkut unnukkut Nuummi aallaasersortoq", Ole Brandtip Aqqutaani Mannguanilu najugallit - Sermitsiaq.AG-ip paasissutisssaatai naapertorlugit - politiinit illunit aneqqusaajunnaartut aallaasersortoqarnera pissutigalugu. Taamaattumik allaaserisaq maannakkorpiaq mianersoqqussutitut aallartippoq. Pisut ingerlaqqipput allaaserisarlu ingerlaavartumik uani immikkoortortami pisut ineriartornerinik allaaserinniffiuvoq. Taamaattumik allaaserisaq pisut ineriartornera naapertorlugu allataavoq, paasinarnerulluni sisamanngornermi unnukkut pisut malinnaaffigalugit atuassagaanni.
Allaaserisaq nal. 21.00-miit nutarteqartarpoq - kingullermik nal. 22.53: