D: Akuerisaanngitsumik immiussineq unitsiguk - tillipputit

- Demokraatini isumaqarpugut piffissanngortoq, inuit paasissammassuk taamaaliorneq tillinnerusoq Brugsenimi sukkulaamik tillitamik kammalaammik nereqateqarnerut, Demokraatit isumaqarput

Nuummi ukioq manna Aqua-kkut tusarnaartitsinerannit assilisaq. Assi: Leiff Josefsen

- Inerteqqutaavoq nipilersukkamik immiussinissaq allanullu agguaallugu. Taamatut naatsumik oqaatigineqarsinnaagaluarpoq. Ajornartorsiutaavorli inuppassuit unioqqutitsineq soqutiginngimmassuk. Ingerlatiinnartarlugulu.

Taama Demokraatit politikkikkut oqaaseqartartuat, Anda Uldum, oqallisissiami matumani allappoq:

”Inerteqqutaavoq nipilersukkamik immiussinissaq allanullu agguaallugu. Taamatut naatsumik oqaatigineqarsinnaagaluarpoq. Ajornartorsiutaavorli inuppassuit unioqqutitsineq soqutiginngimmassuk. Ingerlatiinnartarlugulu.

Læs også "Atassut: Vores musikbranche bløder"

Naatsumik oqaatigalugu imaappoq, kalaaleq nipilersortartoq nipilersuusiorpat saqqummersinneqartumik, taava taassuma tunisaqarnini isertitsissutigisarpaa.

Nipilersortartoq akissarsiassaqanngilaq nipilersukkani immiunneqarmat tamanullu agguaanneqarluni. Tassa imaappoq kalaallit nipilersungaannik ikinngutivit iPhoneaniik imaluunniit assigisaaniik immissinitit tamaasa nipilersortartumit nipilersuummik piginnittumit tillittarputit.

Kamimmi colamik tillikkuit taava niuertup iluanaarutissaanik tillissaatit. Kalaaliaqqami qaleralimmik tillikkuit aalisartup iluanaarutissaa tillissavat. Qularinngilara tamatta isumaqatigiissutigissagipput, niuertumit aalisartumillu tillinneq eqqunngitsuliornerusoq, kisianni sooruna isumaqatigiissutigisinnaanngikkipput nipilersortartumit tillinneq ajortuliornerusoq ?

Apeqqutaavoq paasissutissiineq

Demokraatini isumaqarpugut qaammarsaanissaq amingaataasoq. Isumaqarpugut qaammarsaaneq aqqutigalugu oqaluttuarineqartariaqartoq tillinnerusartoq nipilersukkamik akuerineqaqqaarani immiussisoqaraangat.

Demokraatini iluatsillugu unioqqutitsilluni immiussisarnerup allanullu agguaassisarnerup nipilersortartunut qanoq ajoqutaatiginera pillugu nipilersortartut qaammarsaalernerat tamakkiisumik tapersersorparput.

Tamanna oqallinnissamut aallarniutigisigu, neriuppugullu tamatuma kinguneranik amerlanerungaartut paasiumaaraat, nipilersortartut qanoq ajoquserneqartartigisut nipilersugaat tillinneqaraangata, Anda Uldum.

Illit isumaqarpit tillinnerusoq? Oqallinnermi peqataagit.

Powered by Labrador CMS