Afis-operatørenngorniat nutaat aallartittut
Camilla Lorentzen, Ittoqqortoormiuneersoq Mittarfeqarfinni Afis-imik ilinniagaq Narsarsuarmi ingerlanneqartartumi inuusuttut sisamat allat ilagaat
Ataasinngornermi ilinniakkamik Afis-operatøritut taaguutigilersinnaasaminnik aallartitsisut tassaapput Jonas Kruse, Qaarsut, Ujarneq Sørensen, Sisimiut, Camilla Lorentzen, Ittoqqortoormiut aamma Paninnguaq Kristensen, Uummannaq.
Afis-operatørit timmisartoqarfinni napasuliani sulisuupput timmisartut aallarniartut mittussallu aaqqissuuttarpaat timmisartortartunut paasissutissanik ingerlatitseqqillutik.
- Nalunngilara sakkortussasoq piumasaqaatitaqaqisorlu, kisianni nuannaarutigaara ilinniartut sisamaannaammata taamaattumik eqqarsaqqissaarnissaq pingaaruteqarpoq, 20-nik ukiulik Camilla Lorentzen oqarpoq.
Juunimi GU Nuummi naammassivaa taassuma ukiup siuliani Sorømi efterskolersimalluni.
Kalaallit Nunaannut iluaqqutaaneq
Ilinniarneq qaammatini qulini sivisussuseqarpoq qaammatini arfineq-marlunni Mittarfeqarfiit Afis-imik ilinniarfianni Narsarsuarmiittumi atuariarluni qaammatini pingasuni mittarfiit arlanni sungiusarnitaqarluni.
19-issaat Afis-imik atuarfimmi ilinniartunik aallartittoqarpoq aamma Mittarfeqarfiit piffissap ingerlanerani Afis-imik ingerlatsisartuni amerlanerpaat nammineq ilinniarnissaat isumaginikuuaat ingerlatsivimmut inuiaqatigiinullu iluaqqutaasumik.
Ilinniagaq aqqutigalugu Kalaallit Nunaanni sumiluunniit sulisoqarsinnaavoq aamma Camilla Lorentzenip timmisartoqarfinni assigiinngitsuni sulinissani misilikkusuppaa, siunissarli ungasinnerusoq eqqarsaatigalugu illoqarfigisaminut qanittumi najugaqarusulluni.