Ataatsimoorfik peqataaffigaarput ataatsimut akisussaassuseqarluta

Imminnut toquttartut qanoq ikilisinneqarsinnaappat? Atassummit Steen Lynge siunnersuivoq

Steen Lynge, Atassut. Assi: Leiff Josefsen

Nunarsuaq tamakkerlugu imminut toquttarnerup pinaveersaartinnissaa ataasinngornermi ulloqartinneqarneranut atatillugu Steen Lynge Atassut oqallisissiamik allaaserisaqarpoq, tassani imminut toquttartut ikilisinniarlugit qanoq iliortoqarsinnaaneranik siunnersuuteqarluni:

"Kalaallit Nunaanni ukiut tamaasa imminnut toquttut amerlasaqaat, taakkua ilaquttatik ikinngutitillu aliasuuteqaqisut apeqquterpassuarnik qimatsivigalugit imminnut toquttarput.

Apeqqummut akissutissat amerlagunaraluaqaat, tamatta assigiinngeqigatta. Assigiinngikkaluaruttaluunniit taamaakkaluartoq pissutsit assigiinngitsut aallaavigalugit assigiissuteqaqaagut. Illoqarfimmi nunaqarfimmiluunniit ataatsimi ilaqutagut ikinngutigullu najugaqatigaagut. Tamatuma saniatigut nujukkatsinni innuttaaqatigut allat ulluinnarni attaveqatiginngisagut peqatigaagut, misigisimasarluta susassarinagit. Ilisarisimanngisagut soorunami aatsaat aperisinnaallugit ikiorneqarnissamik atorfissaqartitsinitsinni.

Isumaqarpunga, innuttaasut misigiartuinnartut inuit sussassaqaqatiginngisagut illoqarfeqatigigaluarlugilluunniit susassarinngikkigut. Tamanna erseqqissisarpoq meeqqat inuusuttuaqqallu ulorianartumik imaluunniit allanik innarliisinnaasumik pinnguartut isiginnaaraangatsigit - sanioqqulluta uparuaagaangatta. Meeqqat narrutsattarput imaluunniit kamaammertarput ilaqutarinngisaminnik pinnguarnerat ulorianartoq aserorterineralluunniit uparuarneqartaraangat.

Meeqqat allanut tusaassannginnamik?
Meeqqat ullumikkut perorsarneqartarput inunnut ilisarisimanngisaminnut tusarnaartussiaanatik, 'allat oqaasissaqanngimmata' ...

Taamaasillutik meeqqat avatangiisiminnut tatiginnikkunnaartarput ullut tamaasa oqarfigineqartaramik ilaqutarinngisaminnut ikinngutiginngisaminnulluunniit naalaartassangitsut. Apeqqutigineqarsinnaavoq meeqqat inuusuttuaqqallunniit qanoq isillutik ilisarisimanngisaminnut ikiortissarsiorsinnaanersut ulluinnarni iliuuserisartagaat pillugit ilisarisimanngisaminnit oqarfigeqqusaanngippata?

Isumaqarpunga meeqqat inunnut allanut tatiginninnerat innarlinngikkaluarlugu ilitsersuussisoqarsinnaasoq inuit allat aamma mianersorfigisariaqartarmata.

Ataatsimoorfik peqataaffigaarput ataatsimut akisussaassuseqarluta
Inuit inoqateqartussaallutik pinngortitaapput aamma ukioq 2012 inuuffigigaluarlutigu.

Taamaattumik innuttaasut tamarmik ilisimasariaqarpaat ataatsimoorfimmi ataatsimut akisussaaqataallutik inuugamik.

Tamatta akisussaaffigaarput meeqqanit aamma inuusuttuaqqanillu atorfissaqartinneqarluta perorsaanissarput. Upperaara meeqqagut inuusuttuarartagullu perorsarsinnaagivut 'takornartanik' tatiginnittussanngorlugit aamma ataatsimoorfimmik inuusutut akisussaaqataasutut. Tamanna meeqqanut toqqissisimanartuussaaq akisussaaqataanermillu misigisaqarfiussalluni.

Tamanna aqqutigalugu imminnut toquttartut ikilisinneqarsinnaapput", Steen Lynge allappoq.

Powered by Labrador CMS