Tupaallaataasumik marlunnik ujaminnappoq
Liza Tuperna Itzchaky holdikkaarluni unammeqatinilu bronzinnapput ukioqatimini DM maratonip affaa ajugaalluni kuultinnalluni
Kalaaleq arpattartoq, Liza Tuperna Itzchaky, sapaatip akunnerata naanerani danskit maratonip affaanik pissartanngorniunneranni Københavnimi ingerlanneqartumi peqataavoq. Arpanneq Berlin Maratonimut piareersaataavoq taanna septembarip 30-anni ingerlanneqartussaalluni.
- Sapaatit akunneri qaangiuttut sapaatip akunneranut 120 kilometerit missaat sungiusarpakka, sapaatip akunnerata siuliani takinerpaamik arpallunga 138 kilometerit anguakka, Liza Tuperna Itzchaky Sermitsiaq.AG.-mut oqarpoq.
- Taamak kilometerinik amerlatigisunik arpannikuulluni maratonip affaanik peqataalerama naatsorsuutiginngikkaluarpara taama angusaritsiginissara. Arpannissamut aatsaat taamak peqataasussat amerlatigipput 9000-iugamik, taamaattumik malugisinnaavara illoqarfissuarmi arpanneq angisooq ingerlanneqalersoq.
- Arpanneq pitsaasuuvoq aqqutaani ajortut ajunngitsullu naapitassaallutik. Apuukkamali silara kaavittupilussuuvoq. Arpattalerama aatsaat aappassaanik taamannak misigisaqarpunga siullermik 2006-imi Paris Maratonimi imiinnarmik imernikuullunga taamannak misigisimavunga, maannakkulli angusara nuannaarutigaara naammagisimaaqalugulu.
Liza Tuperna Itzchakyp 21 kilometerit ingerlaarpai atorlugit 1.25,05 tiimit, apuuttunit nummer 16-imut inissilluni. Tamatuma saniatigut inuttut rekordiliivoq pisarnermit 2,35 minutsinik sukkanerugamik. Timersoqatigiiffik ilaasortaaffigisaa Sparta bronzit tamaasa pissarsiaraat kiisalu holdikkaarluni DM-imi ukioqatimini kuultinnalluni Liza Tuperna Itzchaky. Arpannissani tullia qilanaariinnalerpaa taanna septembarip 30-anni Berlinimi ingerlanneqassaaq.