Mestersvigimut rødkåli

Ataasinngornermi ullaakkut umiarsuaq alapernaarsuut Triton Kalaallit Nunaata tunuata avannaani sumiiffik imaatigut annaassiniarfissatut aalajangiussaq ungasippallaarunnaarpaat, sungiusarfissatut piukkussaq Tunup avannaani Ella Ø'p eqqaani ingerlanneqassaaq.

Umiarsuaq 98-inik issimasulik - taakkunannga inuttat 52-t - maanna 540 sømil imaluunniit 1000 kilometerit missaat ingerlaarfigisimalereerpaa.

Ataasinngornermi ullaaralaaq Lynx'i Tritonimit tingivoq ilaatigut Mittarfeqarfinni timmisartuussinermik pisortanik issimasoqarluni, taakkua Mestersvigimit imaatigut annaassiniarneq sapaatip akunnerani kingusinnerusukkut aaqqissuunneqartussami piareersimaniarlutik. Timmisartuunneqartut nassataasa ilagaat siparni rødkålinik imalik angutinut marlunnut ukioq naallugu Mestersvigimi ingerlatsisunut tunniunneqartussaq.

Ataasinngornikkut kingusinnerusukkut Tritonimi ilaasut annaassiniarluni sungiusarnissamik Sarex 2012-imi ingerlatsinissaq pillugu annermik paasisaqassapput.