Ajunaartitsisuusaarluni sungiusarnissaq anorersuarmit akornuserneqarsinnaavoq
Silarlussuup sungiusarnissaq piviusuusaarnerutissavaa, Kalaallit Nunaanni Sakkutooqarfimmi pisortaq Politikenimut oqarpoq
Anorersuarsuaq Tunumi Islandip aamma Danmarksstrædetip akornanni pinngoriartorpoq. Taassuma nassataanik nunat tamalaat aaqqissuussaanik issittup imartaani annaassiniarnermik sungiusarnissaq SAREX Greenland Sea 2012, uppernassuseqarnerusissavaa pissanganarnerulersillugulu danskit sakkutuuisa takorloorsimasaannit, Politiken.dk allappoq.
Sungiusarnissarsuaq isorartussutsimi avannamut 72-imi umiarsuarni takornariartaatini ajunaartitsisuusaarnermi annaassiniarneq ingerlanneqassaaq inuit 1.000 amerlanerit, umiarsuit aamma nunanit assigiinngitsunit timmisartut kiisalu Kalaallit Nunaanni, Islandimi aamma Danmarkimit pisortat peqataaffigisassaat.
- Sumiiffimmi sila peqqarniitsorsuussaaq sungiusarnermik assorsuaq sunniisinnaasoq, kontreadmiral Henrik B. Kudsk, Kalaallit Nunaanni Sakkutooqarfimmi pisortaq oqarpoq aamma taassuma angutip issittumi imaatigut annaassiniarnermik sungiusarnerit siullersaannik aqutsisussaq aviisimi ullormut saqqumersartumi Politikenimi tusagassiortumut Rasmus Bechimut Tritonimi ilaasumut oqarpoq, taassuma allaaserisani Politiken.dk-mut ilanngutassiarai.
Ajoraluartumik Sermitsiaq.AG-imi tusagassiortoq Hanne Broberg aamma sakkutuut alapernaarsuutaanut Tritonimut ilaasoq atassuteqarfigisinnaasimanngilarput.
Piviusuusaarneruvoq
Silassamik ilimasaarutip ersersippaa sumiiffimmi anorersuarmik pinngoriartortoqartoq.
Politiken.dk naapertorlugu Tritonimi sakkutuut ulluni arlalinni sungiusarnissami immikkut pingaaruteqartumik inissisimasussaapput, taamattumik sungiusarnermi ulluni arlalinni sivisussuseqartussami inuttat atorfillillu allat peqataasussat 'ajunaarfiup' tunngaanut nal. ak. 24-ni umiartornissaminnut piareersimapput, Triton umiarsuarmik takornariartaammik Arctic Victorymik ikiuukkiartornerani.
- Angalaffissatsinni ingiullit 10-12 meterisut portussuseqassangatinneqartut umiarsuarmi naalakkap tullia orlogskaptajn Lars Hemme Nielsen Politiken.dk naapertorlugu neriorsuivoq.
- Sungiusarnerup piviusorpalaarnissaa sapinngisarput tamaat anguniarsimavarput. Maannakkullu sila pisarnermit peqqarniinnerunissaani anguneqassaaq, admiral Kudsk politikenip tusagassiortua naapertorlugu isumaqarpoq.
Sungisuarnermi Danmark, Kalaallit Nunaat, Island, USA, Canada aamna Island kiisalu Norge peqataassapput.
- Sumiiffimmi attaveqaatinik peqanngitsumiissaagut, ilami tamanna soqanngilaq. Nuummit 1.500 kilometerinik ungasissusilimmiissaagut, ikiortissaq qaninneq tamaaniikkami, Bodømit 1.600 kilometerinik ungasissusilimmi norgemiut timmisartunik annaassiniartartuisa inaannut, Københavnimit 2.500 kilometerinik ungaissusilimmi, Kudsk Politiken.dk-mut oqarpoq.