Kromann Nuummi saqqummersitsivoq

Sisamanngornikkut ualikkut Jens Kromannip sisamassaannik Nuummi Katuami saqqummersitsinera ammarpoq. Eqqumiitsuliornermik soqutigisallit inuit 25-t missaanni Katuap paarlersuanut takkussimapput Jens Kromannip qalipagai tamaani nivingasut takusarlugit.

Tuniniaajutigaluni saqqummersitsineruvoq, septembarip arfernganit 26-at ilanngullugu ingerlasussaq, qalipakkat 3.000 koruuniniit 60.000 koruunilinnut akeqartut tamarmik tuniniagaallutik.

Jens Kromann 76-inik ukioqartoq atorumaneqaqaaq nunarsuarmi sumiiffinni assigiinngitsuni suli saqqummersitsisarluni, taamaattoq suli Kalaallit Nunaannit isumassarsiortuarluni.

1960'ikkut naajartorneranni Kalaallit Nunaannut nuuppoq tamaani ukiuni arlalinni najugaqarluni, kingorna eqqumiitsuliornerani katassinnaajunnaarluni sunniuteqartoq. Taamaattumik sapinngisani naapertorlugu suli nunatsinnut angalajuarpoq tamaani isumassarsiortarami.

- Katuap pisortaata Julia Parsip saqqummersitsinermik uuminnga aaqqissuusseqqullunga qinnuigimmanga nuannaajallattorujussuuvunga, uannut Kalaallit Nunaanni saqqummersitseqqinnissaq immikkut isumaqarpoq, Jens Kromann oqaluttuarpoq.

- Taamani ukiuni tallimani maanniikama kingornali qasseerpassuariarlunga nunamik tikitsisarnera assinik paasinnittaatsinnut sunniuteqartorujussuuvoq. Pinngortitarsuaq nalissaqanngitsoq maani nassaassaasoq pissutaalluni nukinnik immikkuullarissunik pinngortoqartarpoq. Qaamaneq aamma qalipaatit taassaanngitsumik pinnissuseqarput. Qorsuinnaanngilaq, tungujortuinnaanngilaq aamma qaqortuinnaanngilaq pinngortitami nassaassaq qalipaaterpassuaqarpoq. Assersuutigalugu aasami seqerngup tarrikkiartulernerani qalipaatit aappalaartut naalagaaleraangata, pissutigalugu naasorpassuit orpikkallu aappalaartunik pilutaqaramik.

- Saqqummersinneqartut qalipagaapput angisuut nutaat, Julia Parsip saqqummersitsinissamut uunga sanaqqullugit qinnutigisaatut. Qalipakkat arlallit 1,70 x 2,20 meterimik annertussuseqarput. Taakkua Katuami saqqummersinnissaat qilanaarisorujussuuara. Illorsuaq pinnersoq pitsaasumik qaamanilik aamma inissarissaartoq uanga qalipakkannut taamak angissusilinnut naleqqulluarpoq.

- Taamaattoq suliat allat minnerit arlallit aamma nassarpakka. Sumiiffinni tamaginni qalipakkat angisuut inissaqartinneqarneq ajorput aamma soorunami kikkunnut tamanut neqeroorutissaqartariaqarpoq, Jens Kromann oqarpoq.

Nunani allani saqqummersitsisarnerit angalanernik ilaqartuarput soorlu Japan, Indonesien, Thailand, Korea, New York, Færøerne, Island aamma - pingaartumik - Kalaallit Nunaat. Taakkununnga ilanngullugit Europami nunat tamaasa. Spania immikkut inissisimavoq taqqavani Jens Kromann qalipaasarfeqarpoq eqqumiitsuliortup eqeersimaartup ukiup affaata annersaani suliffigisarlugu. Tamaannga isumassarsiai qalipagaanni Katuami nivinngasuni takuneqarsinnaalluarput.

Nunatsinni sanaartukkanik pinnersagai eqqaassagutsigit Angmagssalimmi napparsimmavimmik pinnersaavoq aamma sakkutuut imarsiortut umiarsuaanni Hvidbjørnen.

Qalipaasoq upernaakkut 2011 75-inik ukioqalerpoq.

Foreningen Grønlandske Børn 2011-mi qalipakkamik tunissuteqarfigaa.

2009-mi Nanu Børn ikiorpai.