Tuusi Nunat Avannarliit Killiit Siunnersuisoqatigiivini siuttunngorusuppoq
Josef Motzfeldt Nunat Avannarliit Killiit siunnersuisoqatigiivini siulittaasutut qinigaavoq siunnersuisoqatigiit pissaaneqariartuinnarput sumiiffiup kajumigineqarnera pissutigalugu
Nunat Avannarliit Killiit siunnersuisoqatigiivisa siulittaasussamissut toqqarpaat Inatsisartut siulittaasuat Josef Motzfeldt. Tamanna sisamanngornermi pivoq siunnersuisoqatigiit ukiumoortumik Savalimmiuni ataatsimiinnerannut atatillugu.
Josef Motzfeldtip siulersuisutut paarlappaa Henrik Old, Savalimmiuni Lagtingimi ilaasortaq savalimmiormiullu aallartitaasa siulittaasuat.
Nunat Avannarliit Killiit siulittaasuini issiasuulerput siulittaasup tullia Ólína Þorvarðardóttir Altingimi ilaasortaq aamma Henrik Old, Savalimmiuni Lagtingimi ilaasortaq.
Sumiiffik nunanit tamalaanit tatisimaneqartoq
Josef Motzfeldtip siulittaasutut ivertinneqarnerminut atatillugu oqalugiarnermini oqarpoq; "Nunanut Avannarlernut Killernut ataatsimoorussamik soqutigisaqarneq nunanut avannarlerniittunut allanut allaanerusoq, taamaattumillu Nunat Avannarliit Killiit siunnersuisoqatigeeqartoq. Siunnersuisoqatigiit suleqatigiinnerat nunarsuup sinneranut ukiut ingerlaneranni ersarissiartorpoq aamma uagut najugaqarfigut soqutigineqariartorput taamallu nunat tamalaat akornanni nunagut tasimaneqariartorlutik. Nunat Avannarliit Killiit suleqatigiinnerisa nukittunerusup nunanit allanit tatisimanninniat akiornissaannut nukissaqarnerussaagut".
Josef Motzfeldtip pingaartippaa ilinniartitaanermut- aamma peqqissutsimut tunngasutigut suleqatigiinnerup nammineq siulittaasuunermi nalaani ingerlatiinnarneqarnissaa.
Nunat Avannarliit Killiit Savalimmiut Lagtingiata, Kalaallit Nunaata Inatsisartuisa aamma Islandip Altingiata akornanni suleqatigiiffiuvoq.
Nunat Avannarliit Killiit aallartitaat tassaapput siulittaasoq Josef Motzfeldt, ilaasortat Ruth Heilmann, Olga P. Berthelsen, Aleqa Hammond, Astrid Fleischer, Sivert K Heilmann ataasinngornermit tallimanngorneq ilanngullugu Nunat Avannarliit Killiit 28-ssaanik ukiumoortumik ataatsimiinneranni peqataassapput, tamanna ingerlanneqassaaq Savalimmiuni Gjøgv aamma Torshavnimi.