Villy Søvndal: Taamaattumik tunuarpunga
Tullianik qinersisoqarnissaa sioqqullugu piffissaalluarallartillugu SF-imi siulittaasuuffik Villy Søvndalip nukissaqarluartunut ingerlateqqikkusuppaa
SF-imi siulittaasuuffik piffissaalluarallartillugu ingerlateqqinneqassaaq Folketingimut qinersinissaq tulleq nallertinnagu partiimut siulittaasunngortussaq sungiussinissamut piffissaqarsinnaaqqullugu.
SF-ip siulittaasuata Villy Søvndalip siulittaasutut tunuarnini tallimanngornermi ullaakkut partiip nuna tamakkerlugu aqutsisuinut, SF-ip ministeriutitaanut, SF-ip folketingsgruppianu naalakkersuisunullu nalunaarutigisani taama tunngavilersorpaa.
- SF-ip qinersinerni arlalinni ajugaaqataatissimavara SF-ilu perngaammik naalakkersuisooqataalersillugu - siulittaasunngorama taakkua anguniarniarlugit neriorsuutigaara.
- Maannali qinersinissaq tulleq nallertinnagu siulittaasunngortussap sungiussitilluarnissaanut piffissanngorpoq, aalajangerneq pillugu oqarpoq.
- SF-illu oqaluttuarisaanerani immikkoortumi suli nutaajusumi naalakkersuisooqataanermillu imaqartumi nukiit nutaat aqutsisunngornissaat pingaartuuvoq.
Villy Søvndal partiip naalakkersuisooqataalernerata kingorna sakkortuumik tatineqarlunilu isornartorsiorneqartarsimaqaaq - ilaatigut gruppimut siulittaasuusimasumit SF-imilu malunnaateqarluartumit Aage Frandsenimit.
Weekendavisenimi politikkimut tunngasuni tusagassiortoq Hans Mortenseni isumaqarpoq, tamanna Søvndalip aalajangerneranut tunuliaqutaasoq.
- Qinersinermi angusat pitsaanngitsut ingerlaqqipput naalakkersuisooqatigiinnermillu angusat amigaataasut partiip ilumini oqaluuserisarsimavai. Tamakkua Søvndalip tatineqaatigalugillu sakkortuumik isornartorsiorneqaatigai.
- Tamatuma peqatigisaanik marlunnik atuuffeqarsinnaanersoq partiip iluani oqaluuserineqarsimavoq, Hans Mortensen oqarpoq.
Villy Søvndal taartissaminik nassaartoqarnissaata tungaanut siulittaasuugallassaaq.
Nunanut allanut ministeriuinnassasoq
Taamaattorli nunanut allanut ministeritut tunuarnissamik pilersaaruteqanngilaq.
Villy Søvndal nammineq siulittaasussamik eqqoriaarusunngilaq, Tonni Hansenilli partiip nuna tamakkerlugu aqutsisuinut ilaasortaasup siornatigullu siulittaasumut tullersortaasimasup peqqissutsimut ministeri Astrid Krag Søvandalip paarlatsissaatut tikkuarpaa.
- Maannamuugallartoq Astrid piukkunnerpaavara, Ritzauimut oqarpoq Søvndalillu sulineranik naammaginnilluinnarsimanini erseqqissaatigalugu.